سیالکوٹ میں مشتعل ہجوم کے ہاتھوں قتل ہونے والے سری لنکن فیکٹری منیجر پریانتھا کمارا کے کیس کے حوالے سے اہم پیش رفت سامنے آئی ہے۔

پنجاب پولیس نے چھاپے مارکر مزید 6 مرکزی ملزمان کو گرفتار کرلیا ہے۔

ترجمان پنجاب پولیس کا کہنا ہےکہ سی سی ٹی سی فوٹیج اور موبائل کالز ڈیٹا سے گزشتہ 12 گھنٹے میں پولیس نے مزید 6 مرکزی کرداروں کا تعین کرکے گرفتار کرلیا۔

ملزمان کو ویڈیو فوٹیج میں غیر ملکی شہری پر تشدد کرتے دیکھا جا سکتا ہے۔

ترجمان پنجاب پولیس کے مطابق ویڈیو فوٹیج میں کچھ ملزمان کے ہاتھوں میں ڈنڈے اور کچھ کو تشدد کرتے دیکھا جا سکتا ہے۔ ملزمان اپنے دوستوں اور رشتے داروں کے گھروں میں گرفتاری کے ڈر سے چھپے ہوئے تھے۔

ترجمان پنجاب پولیس نے بتایاکہ پولیس جدید ٹیکنالوجی کا استعمال کرکے تفتیش کر رہی ہیں۔ اب تک کی تحقیقات کے مطابق 124 زیرحراست افراد میں سے 19 ملزمان کا مرکزی کردار سامنے آیا ہے۔

پولیس نے بتایا کہ زیرحراست افراد میں سے اشتعال پھیلانے اور تشدد میں ملوث افراد کی نشاندہی کرنے کا عمل جاری ہے۔

وزیراعلیٰ پنجاب سردار عثمان بزدار اور آئی جی پنجاب تحقیقات کے سارے عمل کی خود نگرانی کر رہے ہیں۔

وزیراعلیٰ پنجاب نے ملزمان کے خلاف قانونی کارروائی تیز کرنے کی ہدایت جاری کرتے ہوئے کہاکہ سائنٹفک انداز سے تفتیش کو آگے بڑھایا جائے۔

وزیراعلیٰ پنجاب نے سیکرٹری پراسکیوشن کو کیس کی مکمل پیروی کرنے کا ٹاسک سونپ دیا۔