دوستوں کی شادی کی خوشی میں فائرنگ دولہا کو بھاری پڑ گئی۔

تفصیلات کے مطابق سرگودھا کے علاقے ڈیرہ کامرہ پر غلام مصطفی کی شادی کی تقریب جاری تھی اس دوران شادی میں آنے والے ان کے قریبی دوستوں نے اپنے دوست کی خوشی میں شریک ہوتے ہوئی ہوائی فائرنگ کی تاہم ان کی یہ خوشی دولہا کو بھاری پڑگئی۔

سرگودھا کے ایس ایچ او تھانہ بھلوال سٹی نسیم عباس نے اسسٹنٹ سب انسپکٹر ارشد حسین ودیگر اہلکاروں پر مشتمل ٹیم کے ہمراہ ڈیرہ کامرہ پر شادی کی تقریب پر چھاپہ مارا اور ہوائی فائرنگ کرنے پر دولہا اور 2 ساتھیوں کو گرفتار کرلیا جب کہ ان سے اسلحہ بھی برآمد کرلیا گیا۔

پولیس نے ہوائی فائرنگ کے الزام میں دولہا غلام مصطفی اور اس کے دوستوں تصور، جاوید اقبال کو گرفتار کرلیا ۔ گرفتار ملزمان تصور سے  12 بور کی بندوق جب کہ جاوید اقبال سے 30 بور کی پسٹل برآمد کرکے مقدمہ درج کر لیا۔

پولیس کا کہنا ہے کہ ملزمان کے خلاف ناجائز اسلحہ رکھنے اور شادی کی تقریب میں ہوائی فائرنگ کرنے کی دفعات کے تحت الگ الگ مقدمات درج کرلیے گئے ہیں جب کہ ان سے مزید تفتیش کی جارہی ہے۔

پولیس نے کہا کہ ہم نے فائرنگ کرنے والے شخص جاوید کو اسلحے سمیت گرفتار کیا تو دولہا غلام مصطفیٰ اُسے بچانے کے لیے آگیا جس پر ہمیں اسے بھی موبائل میں بٹھاکر ساتھ لانا پڑا جب کہ ملزمان کو آج رات حوالات میں رکھا جائے گا اور کل صبح مقامی عدالت میں پیش کر کے ریمانڈ کی استدعا کی جائے گی۔