وفاقی وزیر برائے اطلاعات چوہدری فواد حسین کا کہنا ہے کہ پاکستان میں فلموں اور ڈراموں کا بیڑہ غرق کر دیا گیا ہے۔

فواد چوہدری نے نیشنل ایوارڈ کے حوالے سے مفاہمت کی یادداشت پر دستخط کی تقریب سے خطاب میں کہا کہ 1960 میں پاکستان میں دنیا کی تیسری بڑی فلم انڈسٹری تھی۔

وزیرِ اطلاعات نے کہا کہ جس شعبے نے پاکستان کی کہانی دنیا کو بتانی تھی اسے کمزور کیا گیا، تاہم اب ہم نے نئی فلم پالیسی مکمل کرلی ہے۔ ایوارڈز کے لیے 25 کروڑ روپے سے زائد رقم موسیقاروں آرٹسٹس اور فلم سازوں کو دیں گے۔

فواد چوہدری نے کہا کہ پاکستان کی کہانی دنیا کو سنانے والوں کو ماضی میں کمزور کیا گیا اور ہم نے ماضی میں فلم، ڈراموں اور میوزک کا بیڑا غرق کر دیا۔ اگلے سال 22 ایوارڈز میوزیشنز، فلم میکرز اور آرٹسٹس کو دیں گے۔

انہوں نے کہا کہ اشتہارات میں باہر کے ایکٹرز کو لیا جاتا ہے اور اپنے ایکٹرز بے روزگار ہو رہے ہیں۔ اس طرح کے اشتہارات پر بہت زیادہ ٹیکس لگا رہے ہیں۔

وفاقی وزیر نے کہا کہ پی ٹی وی میں فلم ڈویژن بنا رہے ہیں اور ایران کے ساتھ مل کر علامہ محمد اقبال پر فلم بھی بنا رہے ہیں۔ یہ فلمیں بڑے بجٹ کی فلمیں ہیں اور بین الاقوامی سطح کی ہیں۔

انہوں نے کہا کہ ٹیپو سلطان پر بھی فلم بنا رہے ہیں۔ سنیما میں بجلی کے ریٹ انڈسٹریل ریٹ ہوں گے البتہ سنیما کے اوپر سے ہم نے ٹیکس ختم کیے ہیں۔

قبل ازیں، وفاقی وزیر اطلاعات چوہدری فواد حسین کا کہنا تھا کہ ملائیشیا اور پاکستان کے درمیان میڈیا روابط کو فروغ دینے کی ضرورت ہے، فلم اور ڈرامہ کی صنعت میں بھی دونوں ممالک ایک دوسرے کے تجربات سے مستفید ہو سکتے ہیں۔

وفاقی وزیر اطلاعات کا کہنا تھا کہ پاکستانی ڈراموں نے دیگر زبانوں میں ترجمہ کے ساتھ اپنا ایک مقام بنایا ہے، ہم چاہتے ہیں کہ پاکستانی ڈراموں کو ملائیشیا کے عوام کو بھی پیش کیا جا سکے۔

ملائیشیا کے وزیر خارجہ سیف الدین عبداللہ نے اس حوالے سے کہا تھا کہ پاکستان کے ساتھ میڈیا، فلم اور ڈرامہ انڈسٹری میں تعاون کو فروغ دیں گے۔