دفاعی چمپئین خیبر پختونوخواہ نے ناردرن کو 169 رنز سے شکست دے کر قائداعظم ٹرافی کا ٹائٹل اپنے نام کرلیا ۔

 نیشنل اسٹیڈیم کراچی میں کھیلے گئے ڈے اینڈ نائٹ فائنل میچ کے آخری روز دفاعی چیمپئن خیبر پختونخوا نے ناردرن کو 169 رنز کے بھاری مارجن سے شکست دے دی۔

 میچ کے آخری روز کم از کم 64 اوورز میں 384 رنز کے تعاقب میں ناردرن کی پوری ٹیم اپنی دوسری اننگ میں 214 رنز بنا کر آؤٹ ہو گئی

پہلی اننگ میں چار وکٹیں حاصل کرنے والے ساجد خان نے دوسری اننگز میں پانچ کھلاڑیوں کو پویلین کی راہ دکھائی. محمد وسیم جونیئر نے بھی میچ میں چھ وکٹیں حاصل کیں۔

ایونٹ کے ٹاپ اسکورر اور ناردرن کے اوپنر محمد حریرہ نے میچ کی دونوں اننگز میں نصف سنچریاں بنائیں تاہم وہ اپنی ٹیم کو کامیابی نہ دلاسکے.

 اننگز میں 51 رنز کی اننگ کھیلنے والے محمد حریرہ دوسری اننگز میں 57 رنز بنا کر آؤٹ ہوگئے. فیضان ریاض 49 رنز بنا کر دوسری اننگز میں ناردرن کے دوسرے نمایاں بیٹر رہے.

اس سے قبل 118 رنز کی برتری سے اپنی دوسری اننگز کا آغاز کرنے والی خیبر پختونوخواہ نے ریحان آفریدی اور فخر زمان کی نصف سنچریوں کی بدولت 265 رنز بنائے.

 ریحان آفریدی 9 چوکوں اور ایک چھکے کی مدد سے 79 رنز بنا کر آؤٹ ہوئے. فخر زمان نے بھی اتنی ہی مرتبہ گیند کو باؤنڈریز کے باہر پہنچا کر 50 رنز اسکور کیے.

ساجد خان نے 2 چوکوں اور 2 چھکوں کی بدولت 39 رنز کی اننگز کھیلی. محمد نواز نے 4 اور موسیٰ خان نے 3 وکٹیں حاصل کیں.

پہلی اننگز میں افتخار احمد کی سنچری کی بدولت خیبر پختونوخواہ نے 374 رنز بنائے تھے. جواب میں ناردرن کی پوری ٹیم 256 رنز بنا کر آؤٹ ہوگئی تھی. حیدر علی 81 رنز بنا کر آؤٹ ہوئے تھے۔

ناردرن کے مبصر خان کو ٹورنامنٹ کا بہترین کھلاڑی، اوپنر محمد حریرہ کو ایونٹ کا بہترین بیٹر جبکہ روحیل نزیر بہترین وکٹ کیپر قرار دیا گیا.

 فائنل میں سنچری اور دو وکٹیں حاصل کرنے پر خیبر پختونوخواہ کے کپتان افتخار احمد کو پلیئر آف دی فائنل جبکہ علی عثمان کو بہترین باؤلر کا انعام دیا

گیا۔

ایونٹ کی فاتح ٹیم کو ایک کروڑ روپے جبکہ رنرزاپ کو پچاس لاکھ روپے کا انعام دیا گیا۔