مسلم لیگ (ن) پنجاب کی ترجمان عظمیٰ بخاری نے حسان خاور کو بلدیاتی الیکشن لڑنے کا مشورہ دیا ہے۔

انہوں نے اپنے بیان میں کہا کہ حسان صاحب جب آپکو لوگ غیر منتخب کا طعنہ دیتے ہیں تو ہمیں اچھا نہیں لگتا، میرا مشورہ ہے کہ آپ اس بار بلدیاتی الیکشن لڑ لیں۔

عظمیٰ بخاری نے کہا کہ حسان صاحب ”نو عمران اونلی عوام “ ہی اب چلے گا، پنجاب کے بلدیاتی انتخابات میں تبدیلی سرکار کا جنازہ نکل جائے گا۔

ان کا کہنا ہے کہ آج الیکشن کمیشن نے بھی پنجاب حکومت کو دسمبر تک قانون سازی مکمل کرنے کی ہدایت کردی ہے، پی ٹی آئی کے ارکان اسمبلی عوامی غیض و غضب سے بچنے کےلئے اپنے حلقوں میں نہیں جارہے۔

مسلم لیگ (ن) کی ترجمان کا کہنا ہے کہ لوگ ان سے اتنے بدزن ہیں کہ انکے جلسوں اور پارٹی میٹنگز میں انہی کے خلاف نعرے لگ رہے ہیں باتیں ہورہی ہیں۔

عظمیٰ بخاری نے کہا کہ بلدیاتی الیکشن سے فرار کےلئے پی ٹی آئی نے ہر حربہ استعمال کیا لیکن آخر کار قابو میں آگئے، ضمنی انتخابات اور کنٹونمنٹ بورڈ میں شکست کے خوف سے تحریک انصاف پریشان تھی، جو سچ ثابت ہوا۔

ان کا کہنا ہے کہ بزدار سرکار اپنے ہی لوکل باڈی ایکٹ میں تین سالوں میں 35 ترامیم کرچکی ہے لیکن ہر بار انکے جعلی ایکٹ کو الیکشن کمیشن نے مسترد کردیا ہے۔

انہوں نے کہا کہ عمران خان کو معلوم ہے ان حالات میں پنجاب کے عوام پی ٹی آئی کو ووٹ نہیں بددعائیں دے رہے ہیں، عمران اینڈ لوٹ مار کمپنی سوا تین سال کے بعد بھی عوام کے دلوں سے نوازشریف کی محبت کم نہیں کرسکے۔

عظمیٰ بخاری نے مزید کہا کہ نوازشریف اور شہبازشریف نے مخلص اور بے لوث طریقے سے قوم کی خدمت کی، مسلم لیگ(ن) کی لیڈرشپ کا ویژن ملک اور قوم کی ترقی ہے۔