اقوام متحدہ کی سیکیورٹی کونسل نے افغانستان کے لئے انسانی امداد کی قرارداد منظور کرلی۔

اس بات کا اعلان اقوام متحدہ میں پاکستان کے مستقل مندوب نے ہیڈ کوارٹر میں ایک پریس کانفرنس کے ذریعے کیا

اقوام متحدہ میں پاکستان کے مستقل مندوب منیر اکرم نے کہا کہ اس قرارداد کی منظوری سے پاکستان کے موقف کی تائید ہوئی، قرارداد کی منظوری کے بعد افغانستان کو امداد کے حوالے سے قانونی پیچیدگیاں ختم ہو گئی ہیں۔

انہوں نے کہا کہ پاکستان کہتا رہا ہے کہ افغانستان کو بنیادی اشیائے ضرورت کے لئے امداد فراہم کرنا بین الاقوامی قوانین کی خلاف ورزی نہیں۔

اقوام متحدہ میں پاکستان کے مستقل مندوب نے کہا کہ سیکیورٹی کونسل میں قرارداد امریکا نے پیش کی۔

منیر اکرم نے کہا کہ پاکستان چین اور روس نے اس قرارداد کے حوالے سے ممبر ممالک کے ساتھ روابط کئے، قرارداد کی منظوری سے افغانستان کو فوری طور پر امداد کے لئے جمع کی گئی رقم ادا کی جا سکے گی۔

انکا کہنا تھا کہ امداد اقوام متحدہ کے زیلی اداروں کے ذریعے افغانستان کو دی جائے گی، ہمیں خوشی ہے کہ UNOCHA کی اپیل پر مختلف ممالک نے امید سے بڑھ کر امداد دی۔

منیر اکرم نے کہا یہ امداد فوری طور پر اقوام متحدہ کے زیر اہتمام افغانستان پہنچنا شروع ہو جائے گی، اس قرارداد کے بعد افغانستان کے لئے فوری طور پر مزید چار اعشاریہ تین بلین ڈالرز کی اپیل کی ہے۔

انہوں نے کہا وزیراعظم پاکستان نے حالیہ او آئی سی اجلاس میں افغانستان پر پابندیوں کے حوالے سے تشویش کا اظہار کیا تھا، وزیراعظم پاکستان کا ویژن اس قرارداد کی منظوری میں اہم ثابت ہوا ہے۔

انکا کہنا تھا کہ ہمیں پوری امید ہے کہ اس قرارداد کے بعد افغانستان کے منجمد شدہ اکاونٹ بھی بحال ہو جائیں گے، افغانستان میں چالیس برس بعد ایسی حکومت آئی ہے جس کا کنٹرول پورے ملک پر ہے۔

منیر اکرم نے کہا امید کرتے ہیں کہ افغان حکومت بھی اپنے رویے میں بہتری لائے گی اور لا بھی رہی ہے، قرارداد کی منظوری افغانستان کے مستقبل کے لئے بہت اہم ہے۔

انہوں نے مزید کہا اگر فوری امداد افغانستان نا پہنچ پائی تو افغانستان اور اس کے عوام انسانی المیہ کا شکار ہو سکتے تھے، دہشت گرد تنظیمیں صورتحال کا فائدہ اٹھا کر افغانستان کا امن تباہ کر سکتی ہیں، افغانستان سے پسے ہوئے طبقے کی ہجرت خطہ خصوصاً پاکستان کے لئے گہری مشکلات پیدا کرسکتی تھیں۔