کراچی پولیس کے ترجمان نے کہا ہے کہ شہر میں قیامِ امن کیلئے جانوں کا نذرانہ پیش کرنے والے جوان محکمے کا فخر ہیں۔

ترجمان کراچی پولیس کی جانب سے جاری کردہ بیان میں کہا گیا کہ کراچی پولیس کے شہید کانسٹیبل صلاح الدین کی نماز جنازہ گارڈن ہیڈ کواٹر میں ادا کر دی گئی ہے، کانسٹیبل صلاح الدین کو ڈاکوؤں سے مقابلے میں فائرنگ سے شدید زخمی حالت میں اسپتال منتقل کیا گیا جہاں دورانِ علاج جامِ شہادت نوش کیا۔

ترجمان کا کہنا تھا کہ شہید کی نماز جنازہ میں قائم مقام ایڈیشنل آئی جی کراچی سمیت دیگر سینئیر پولیس افسران اور اہلکاروں نے بھی شرکت کی، شہید کانسٹیبل صلاح الدین کی عمر 29 سال اور وہ تھانہ ابراہیم حیدری میں تعینات تھے، شہید نے سوگواران میں بیوہ اور 3 سالہ بیٹا چھوڑے ہیں۔

انہوں نے کہا کہ پولیس کانسٹیبل صلاح الدین ولد در محمد نے 2018 میں کراچی پولیس جوائن کی اور ایمانداری اور بہادری سے اپنے فرائض کی انجام دہی کے دوران مورخہ 12 دسمبر 2021 کو ڈاکوؤں کی فائرنگ سے شدید زخمی ہوئے اور 14 دسمبر 2021 کو دوران علاج شہید ہوئے۔

کراچی پولیس کے ترجمان کا کہنا تھا کہ ایڈیشنل آئی جی کراچی اور دیگر سینئیر پولیس افسران نے بھی شہید کانسٹیبل صلاح الدین کو خراجِ عقیدت پیش کیا۔

ترجمان کراچی پولیس کے مطابق شہریوں کی جان و مال کے تحفظ، امن و امان کے قیام، دہشت گردوں اور جرائم پیشہ عناصر کی سرکوبی کیلئے اب تک کراچی پولیس کے سینکڑوں افسران و جوانوں نے جام شہادت نوش کیا ہے، شہر میں قیامِ امن کیلئے جانوں کا نذرانہ پیش کرنے والے جوان محکمے کا فخر ہیں۔