پاک بحریہ نے ہنگور ڈے گولڈن جوبلی پرخصوصی ویڈیو ریلیز کردی۔

نیول چیف کا کہنا ہے کہ ہم اپنی مادر وطن کی حفاظت کے لیے تمام خطرات سے نمٹنے کے لیے تیار ہیں۔

پاک بحریہ کی جانب سے ریلیز کی گئی ویڈیو میں پاک بحریہ کی آبدوز ہنگور کی دشمن کے خلاف لازوال کامیابی کو اجاگر کیا گیا ہے۔

#CNS Admiral Muhammad Amjad Khan Niazi, Message on the Occasion of Golden Jubilee of HANGOR DAY, 09 December 2021#50thHANGORDay #PakistanNavy pic.twitter.com/V0L9TvVHpp

Advertisement

— DGPR (Navy) (@dgprPaknavy) December 9, 2021

گولڈن جوبلی ہنگور ڈے کے موقع پر امیر البحر ایڈمرل محمد امجد خان نیازی نے پیغام میں کہا کہ 1971 کی جنگ میں پاک بحریہ کی آبدوز ہنگور نے بہادری کی عظیم تاریخ رقم کی تھی۔ 50 سال قبل آج کے دن پاک بحریہ کی آبدوز ہنگور نے بھارتی جہاز کُکری کو سمندر بُرد اور کرپان کو مفلوج کر کے تاریخ رقم کی تھی۔

انہوں نے کہاکہ یہ جنگِ عظیم دوئم کے بعد کسی آبدوز سے بحری جہاز کو تباہ کرنے کا پہلا اور روایتی آبدوز کے ذریعے تباہ کرنے کا واحد واقعہ ہے۔

Pakistan Navy celebrates Golden Jubilee of HANGOR Day: A Tribute to Our Silent Warriors. #50thHANGORDayhttps://t.co/xAyiZpDCT2

Advertisement

— DGPR (Navy) (@dgprPaknavy) December 9, 2021

نیول چیف کا کہنا ہےکہ نہ ہم یہ دن بھولے ہیں اور نہ ہی ہمارا دشمن بھول سکتا ہے۔ یہ واقعہ نہ صرف حربی تکنیکی مہارت کی بہترین مثال ہے بلکہ دشمن کے جارحانہ عزائم کے جواب میں اپنی بحری سرحدوں کی حفاظت کے لیے پاک بحریہ کے غیر متزلزل عزم کا بھی عملی نمونہ ہے۔

ان کا کہنا ہے کہ یہ دن ہمیں ہنگور کے عملے کی بہادری، استقامت اور جذبے کی یاد دلاتاہے۔ ہنگور نے پاک بحریہ کے لیے جو کارنامہ سرانجام دیا وہ اللہ تعالیٰ کے خاص کرم، ہماری آبدوز کے تجربہ کار عملے کی پیشہ وارانہ مہارت کا ثبوت ہے۔ انہوں نے بہترین کارکردگی کا مظاہرہ کیا اور یہ ثابت کیا کہ بہترین سے کم ہونا ناقابلِ قبول ہے۔ پیشہ وارانہ مہارت اور لگن کے ذریعے ہم تمام مشکلات کا مقابلہ کر سکتے ہیں اور اپنی سرحدی سالمیت کو محفوظ رکھ سکتے ہیں۔۔

انہوں نے کہا ہے کہ پاکستان نیوی کی تمام جہتوں میں توسیع کے دوران، آبدوزوں کے حصول کا منصوبہ سرفہرست ہے۔ مجھے یقین ہے کہ مستقبل میں شامل کی جانے والی 8ہنگور کلاس آبدوزیں، ہنگور کی میراث کو آگے لے کر چلیں گی۔ اپنے غازیوں کے اعزاز میں پاکستان میں تعمیر کی جانے والی پانچویں ہنگور کلاس آبدوز کا نام پاک بحریہ آبدوز تسنیم رکھا جائے گا جو کہ اس تاریخی واقعہ کے دوران آبدوز ہنگور کے کمانڈنگ آفیسر کے نام پر ہے۔

امیر البحر ایڈمرل محمد امجد خان نیازی نے پیغام میں کہا کہ ہنگور کا حملہ شاندار تھا لیکن بہادری اور فرض سے لگن کی اور بھی بہت سی داستانیں ہیں، چاہے پھر وہ غازی کی شہادت ہو یا آپریشن سومنات، پاک بحریہ نے میدان جنگ میں ہمیشہ اپنی صلاحیتوں کا لوہا منوایا ہے۔ میں پاک بحریہ کے فلیٹ اور سب میرین اسکواڈرن کو ملک کے بحری مفادات کے تحفظ کے لیے شاندار خدمات سر انجام دینے پر مبارکباد پیش کرتا ہوں۔ ہم اپنی مادر وطن کی حفاظت کے لیے تمام خطرات سے  نمٹنے کے لیے تیار ہیں۔