پاکستان مسلم لیگ (ن) کی ترجمان مریم اورنگزیب نے وزیراطلاعات فواد چوہدری کے بیان کو بے حسی کی انتہا قرار دے دیا ہے۔

انہوں نے اپنے بیان میں کہا ہے کہ 100 فیصد مہنگائی کر کے30 فیصد رعایت کا جھوٹ قوم کے ساتھ سنگین مذاق ہے، قوم مہنگائی سے مررہی ہے لیکن اس حکومت کو کوئی فرق نہیں پڑتا۔

مریم اورنگزیب نے کہا کہ دوائی سے 3 سے 7 روپے ہوجائے عمران صاحب کو کوئی فرق نہیں پڑتا، چینی 52 سے 120، آٹا 35 سے 80 ہوجائے لیکن انکو فرق نہیں پڑتا کیونکہ ان کا کچن کوئی اور چلاتا ہے۔

مسلم لیگ (ن) کی ترجمان نے کہا کہ پیٹرول کی قیمت 100 روپے سے 146 ہوجائے لیکن عمران صاحب کوئی فرق نہیں پڑتا، ڈالر 124 سے 180 پر چلا جائے لیکن ان کو فرق نہیں پڑتا۔

انکا کہنا ہے کہ 39 ماہ میں ملک پر قرض اور ادائیگیوں کا بوجھ 20 ہزار 605 ارب ہوجائے لیکن عمران صاحب کو فرق نہیں پڑتا، ملک پر قرض اور ادائیگیوں کا مجموعی بوجھ 50 ہزار 484 ارب روپے سے زائد بڑھ چکا ہے لیکن انکو فرق نہیں پڑتا۔

مریم اورنگزیب نے کہا کہ عمران صاحب سے قوم کو ایک ہی رعایت چاہیے کہ اس قوم کی جان چھوڑ دیں، ایل این جی میں 122 ارب کا ڈاکہ، کورونا ریلیف فنڈ کے 350 ارب میں 40 ارب کا ڈاکہ پڑجائے لیکن کرپٹ حکومت کو فرق نہیں پڑتا۔

انہوں نے مزید کہا کہ جن کو تاریخی معاشی تباہی، بے روزگاری اور مہنگائی سے فرق نہیں پڑتا وہ کیسے عوام کو ریلیف دے سکتے ہیں، عمران صاحب استعفیٰ دیں گے تو عوام کو فرق ضرور محسوس ہوگا، انہیں اس تباہی سے نجات مل جائے گی۔