غیرقانونی سوسائٹیز کے قیام اور آلودگی پر لاہور ہائیکورٹ نے اظہارِ برہمی کرتے ہوئے کہا ہے کہ حکومت راوی اربن ڈویلپمنٹ پراجیکٹ سے پہلے شہر سے آلودگی کا خاتمہ کرے۔

تفصیلات کے مطابق جسٹس شاہد کریم نے راوی اربن ڈویلپمنٹ پراجیکٹ کیخلاف دائر درخواست کی سماعت کی۔  راوی اربن ڈویلپمنٹ پراجیکٹ کی طرف سے بیرسٹر علی ظفر نے دلائل میں کہا کہ دنیا بھر میں بلدیاتی ادارے ماسٹر پلان کے پابند ہوتے ہیں لیکن پاکستان میں بلدیاتی ادارے خود ہی ماسٹر ہوتے ہیں اور بلدیاتی ادارے جو چاہے ماسٹر پلان میں تبدیلی کر دیتے ہیں۔ بیرسٹر علی ظفر نے کہا کہ بے ترتیبی سے تعمیرات کو روکنے کیلئے راوی اربن ڈویلپمنٹ پراجیکٹ شروع کیا گیا۔

بیرسٹر علی ظفر سے مکالمے کے دوران جسٹس شاہد کریم نے برہمی کا اظہار کرتے ہوئے کہا کہ حکومت کیا کر رہی ہے؟ پہلے اس بے ترتیب تعمیرات کیخلاف تو کارروائی کرے۔ لاہور اس وقت آلودہ ترین شہر بن چکا ہے اور ایسے معاملات میں نہ صرف عدالتوں کو آنا پڑتا ہے بلکہ بعض اوقات اپنے دائرہ اختیار سے باہر بھی حکم جاری کرنا پڑتا ہے۔

جسٹس شاہد کریم نے کہا کہ اسموگ کے معاملے میں یہی کچھ ہو رہا ہے۔ لاہور اس وقت آلودہ ہو رہا ہے۔ اب سارے شہری تو نئے لاہور میں منتقل نہیں ہو سکتے۔ بڑی اچھی بات ہے کہ حکومت کو یہ خیال آیا کہ ایک ترتیب سے شہر بنایا جائے مگر نیا پراجیکٹ بنانے سے پہلے حکومت قانونی تقاضے تو مکمل کرے۔ جگہ جگہ غیر قانونی سوسائٹیز بن رہی ہیں کوئی پوچھنے والا نہیں ہے۔ حکومت کہاں ہے؟

اپنے ریمارکس میں جسٹس شاہد کریم نے کہا کہ اسموگ کا کیس مَیں ہفتے میں 2 بار سنتا ہوں تاکہ اسموگ کا مسئلہ حل ہو سکے۔

بیرسٹر علی ظفر نے عدالت کو یقین دہانی کرائی کہ وہ بہ طور سینیٹر ساتھی سینیٹرز کے ساتھ مل کر قانون سازی کے لیے پرائیویٹ بل سینٹ میں پیش کروائیں گے۔ انہوں نے مزید دلائل دیے کہ راوی اربن ڈویلپمنٹ پراجیکٹ جگہ جگہ سوسائٹیز کے قیام کے تدارک کے لیے ہی شروع کیا گیا ہے۔

عدالت نے بیرسٹر علی ظفر کو دلائل جاری رکھنے کی ہدایت کرتے ہوئے سماعت 17 دسمبر تک ملتوی کر دی۔