قومی کرکٹ ٹیم کے فاسٹ بولر شاہین شاہ آفریدی نے کہا ہے کہ گلگت بلتستان میں کھیلنے کا موقع ملا تو میں خوش قسمت ہوں گا۔

پاکستان کے مایہ ناز فاسٹ باولر شاہین شاہ آفریدی کی وزیر اعلیٰ گلگت بلتستان خالد خورشید خان سے ملاقات ہوئی۔

وزیر اعلیٰ گلگت بلتستان نے کہا کہ گلگت بلتستان میں انٹرنیشنل کرکٹ اسٹیڈیم کی تعمیر کے لیے اقدامات کر رہے ہیں۔

انہوں نے کہاکہ  گلگت بلتستان کے لوگ قومی کرکٹ ٹیم کے کھلاڑیوں کو اپنے علاقے میں کرکٹ کھیلتے دیکھنے کے لیے بے تاب ہیں۔

اس موقع پرشاہین شاہ آفریدی نے کہا کہ  اگر مجھے گلگت بلتستان میں کھیلنے کا موقع ملا تو میں خوش قسمت ہوں گا۔

وزیر اعلیٰ گلگت بلتستان خالد خورشید خان نے شاہین شاہ آفریدی کو یادگاری شیلڈ بھی پیش کی۔

اس سے قبل پاکستانی کرکٹر شاہین  شاہد آفریدی نے کہا تھا کہ ویسٹ انڈیز کے خلاف دونوں ٹیسٹ میچز بہت اہم ہیں، ویسٹ انڈیز میں پہلی مرتبہ کوئی ٹیسٹ میچ کھیلوں گا، ٹی ٹونٹی میں آرام کیا ہے، پرامید ہوں کہ ٹیسٹ سیریز میں بہتر کارکردگی کا مظاہرہ کروں گا، اس سیریز کے لئے انفرادی اہداف بھی بنا رکھے ہیں۔

ان کا کہنا ہے کہ ورلڈ کپ سے قبل اپنی فٹنس کو مزید بہتر بنانے کی کوشش کررہا ہوں، ہمارا ٹیسٹ اسکواڈ مضبوط اور تسلسل سے بہتر کارکردگی پیش کررہا ہے، یاسر شاہ اور حسن علی کی واپسی سے باؤلنگ یونٹ کا کمبی نیشن مزید بہتر ہوگیا ہے، گیانا میں بارش کے باوجود دو روزہ انٹرا اسکواڈ پریکٹس میچ میں بھرپور تیاری کی ہے، پریکٹس میچ میں بیٹسمین اور باؤلرز کو تیاری کا موقع ملا ہے۔