یوٹیوب کی جانب سے پاکستان میں سب سے زیادہ دیکھی جانے والی ویڈیوز کی فہرست جاری کی گئی ہے۔

امریکی آن لائن ویڈیو شیئرنگ اینڈ سوشل میڈیا پلیٹ فارم یوٹیوب نے اپنے صارفین کی آسانی کے لیے ویڈیوز اپ لوڈ کرنا انتہائی آسان کردیا ہے اور وہ دنیا بھر میں موجود صارفین کی سرچ ہسٹری پر نظر رکھتا ہے جس کے باعث وہ آسانی سے اپنی پسندیدہ ویڈیوز تک رسائی حاصل کرلیتے ہیں۔

یوٹیوب کی جانب سے جاری کی گئی فہرست میں وہ ویڈیوز شامل کی گئی ہیں جو پاکستان میں رواں سال ٹاپ ٹرینڈ میں شامل رہی یا پھر انہیں بار بار دیکھا گیا ہو۔ فہرست میں ابتدائی چار نمبر دیکھ کر یوٹیوب پر پاکستانیوں کی ترجیحات کا بخوبی اندازہ ہورہا ہے جس میں ڈراموں کو برتری حاصل ہے۔

البتہ اس فہرست میں ڈراموں اور فلموں کے علاوہ بچوں کی ویڈیوز بھی شامل ہیں، چونکہ دنیا بھر سمیت کورونا کے باعث پاکستان میں بھی لاک ڈاؤن کے باعث زیادہ تر اسکولز بند رہیں اور والدین نے بچوں کو گھر معلوماتی ویڈیوز دکھا دکھا کر وقت گزارا۔

اس فہرست میں پہلے نمبر پر نجی ٹی وی چینل کا ڈرامہ ’خدا اور محبت سیزن تھری‘ کی پہلی قسط شامل ہے۔ ڈرامے میں فیروز خان اور اقرا عزیز نے مرکزی کردار ادا کیا ہے۔

دوسرے نمبر پر ایک اور نجی ٹی وی چینل پر ڈرامہ ہی موجود ہے۔ اداکارہ عائزہ خان اور اداکار عثمان خالد بٹ کے ’’چپکے چپکے‘‘ کی آخری قسط کو بھی بہت بار دیکھا گیا۔

تیسرے نمبر پر بھی ایک اور ڈرامہ سیریل موجود ہے۔ اداکار دانش تیمور اور ادکارہ منال خان کے ڈرامے ’’عشق ہے‘‘ بھی پاکستانیوں کا پسندیدہ ترین ڈرامہ رہا۔

پاکستان میں یوٹیوب پر ڈرامہ دیکھنے والوں کی تعداد کا اندازہ اس بات سے بھی ہوتا ہے کہ چوتھے نمبر پر بھی ڈرامہ ہی موجود ہے لیکن اس بار پاکستانی نہیں بلکہ ترک ڈرامہ سیریل ’’ارطغرل غازی‘‘ کے تیسرے سیزن کی پہلی قسط یہ اعزاز حاصل کرنے میں کامیاب رہی۔

پانچویں نمبر پر ’’پوگار‘‘ نامی ہندی ڈبنگ میں فلم موجود ہے۔

چھٹے نمبر پر موجود ویڈیو سیکھنے سکھانے کے حوالے سے ہے جس میں ’’ایزی اینڈ کوئک ڈیکوریٹنگ ٹٹوریل فار ایوری ون‘‘ موجود ہے۔

ساتویں نمبر پر بھارت کا مشہور ترین کامیڈی ڈرامہ سیریز ’تارک مہتا کا الٹا چشمہ‘ کی ایک قسط ہے جس میں مشہور کردار بھیڑے کو بالکونی سے کودتے ہوئے دکھایا گیا ہے۔

آٹھویں نمبر پر پنجابی فلم موجود ہے جس کا نام ’’کڑیان جوان بپو پریشان‘‘ ہے۔

نویں نمبر پر بھی فلم موجود ہے لیکن یہ ایک ہندی ڈبنگ والی فلم ’’مس انڈیا 2021‘‘ ہے۔

دسویں نمبر پر بچوں کا چینل ’’اے کیو انگلش‘‘ موجود ہے جس کی ویڈیو ’’اسپیک انگلش ود کڈز سینٹنس ود اردو ٹرانسلیشن‘‘ ٹاپ ٹریںڈ میں شامل ہے۔