وزیراعظم عمران خان  کی زیر صدارت پنجاب میں ترقیاتی بجٹ کے حوالے سے اہم اجلاس ہوا جس میں وزیراعظم کو پنجاب میں ذرائع مواصلات ، تعلیم سڑکوں کی تعمیراور صحت کے شعبے میں جاری ترقیاتی پروجیکٹس کی تکمیل پر درکار بجٹ پر چیئرمین پلاننگ اینڈ ڈویلپمنٹ عبداللہ سنبل نے بریفنگ دی۔

 اجلاس میں صوبائی وزیر خزانہ مخدوم ہاشم جواں بخت نے وزیراعظم کو بریف کیا کہ پنجاب کا حالیہ ترقیاتی بجٹ تاریخی طور پر سب سے بڑا سات سو چالیس ارب روپے مختص کیا گیا ہے۔

 اجلاس کی صدارت کرتے ہوئے وزیراعظم عمران خان نے عوامی فلاح کے تمام منصوبوں  پر درکار بجٹ کو ترجیحی بنیادوں پر فراہم کرنے کی ہدایت کی تاکہ ان منصوبوں کو بروقت اور احسن طریقے سے مکمل کر کے مؤثر  عوامی خدمت کو یقینی بنایا جا سکے۔

وزیراعظم عمران خان نے عوامی فلاح کے ترقیاتی  منصوبوں سے متعلق عوامی آگاہی کی مہم کومزید موثر بنانے کی بھی ہدایت کی۔

اجلاس میں وزیراعلیٰ پنجاب سردار عثمان بزدار، وفاقی وزیر اطلاعات و نشریات چوہدری فواد حسین، وفاقی وزیر تعلیم شفقت محمود  وزیراعظم کے معاون خصوصی برائے سیاسی ابلاغ شہباز گل، وزیر مملکت برائے اطلاعات و نشریات فرخ حبیب، صوبائی وزیر خزانہ مخدوم ہاشم جوان بخت، چیف سیکرٹری پنجاب اور دیگر اعلیٰ حکام نے شرکت کی۔

علاوہ ازیں وزیراعظم عمران خان کی زیر صدارت اراکین پنجاب اسمبلی کا اجلاس ہوا جس میں صوبے کی مجموعی سیاسی صورتحال سے متعلق امور پر تبادلہ خیال کیا گیا۔

اجلاس میں وزیراعظم نے تمام ایم پی ایز کو ہدایت کی کہ وہ آئندہ بلدیاتی انتخابات میں انتخابی کامیابی کو یقینی بنانے کے لیے عوام سے اپنے روابط کو بہتر بنائیں۔