پاکستان نے مقبوضہ کشمیر میں قابض بھارتی افواج کے ہاتھوں نہتے کشمیریوں کے مسلسل ماورائے عدالت قتلِ عام کی شدید مذمت کی ہے۔

ترجمان دفتر خارجہ عاصم افتخار احمد کا کہنا ہے کہ پاکستان نہتے کشمیریوں کی جعلی تلاشی، گھیراو اور جعلی مقابلوں میں قتل عام کی سخت مذمت کرتا ہے۔

ترجمان دفتر خارجہ نے اپنے بیان میں کہا کہ بھارتی قابض افواج کے آج پلوامہ میں خود ساختہ تلاش و گھیراو آپریشن میں 2 کشمیریوں کو شہید کر دیا گیا۔

عاصم افتخار احمد نے کہا کہ گذشتہ ایک ماہ میں بھارتی قابض افواج نے مکمل استثنا کے ساتھ 18 نہتے کشمیریوں کو شہید کیا۔

ان کا مزید کہنا تھا کہ کشمیریوں کی بنیادی آزادیاں تاحال معطل ہیں، گذشتہ ہفتوں میں قابض بھارتی افواج نے مقبوضہ کشمیر میں اپنے ظلم کو بڑھا دیا ہے۔

عاصم افتخار نے کہا کہ کشمیریوں کے لیے ہائبرڈ دہشت گرد اور سفید پوش دہشت گرد جیسی قابل نفرت ہتک آمیز اصلاحات استعمال کی جا رہی ہیں۔

انہوں نے کہا کہ مقبوضہ علاقے میں انسانی حقوق اور سلامتی کی تیزی سے ابتر ہوتی صورتحال عالمی برادری کے لیے تشویش کا باعث ہے۔

ترجمان دفتر خارجہ نے کہا کہ بھارتی وزراء کا مقبوضہ علاقوں کا دورہ بھارت کی ریاستی دہشت گردی کی پالیسی سے نظر ہٹانے کا منصوبہ ہے۔

ترجمان عاصم افتخار نے کہا کہ بھارت سمجھ لے خطے میں مستقل امن اور ترقی کا راستہ کشمیری عوام کو اقوام متحدہ قراردادوں کے زریعہ حق استصواب رائے دینے میں ہے۔