سپریم کورٹ نے نسلہ ٹاور کی 780 مربع گز زمین کو ضبط کرنے کا حکم دے دیا۔

عدالتِ عظمٰی نے سندھ ہائی کورٹ کے آفیشل اسائنی کو زمین تحویل میں لینے اور فروخت روکنے کا حکم دیتے ہوئے کہا کہ نسلہ ٹاور کا بلڈنگ پلان منظوری دینے والے افسران کے خلاف کارروائی کی جائے۔

سپریم کورٹ نےحکم دیتے ہوئے کہا کہ ملوث افسران کے خلاف محکمہ جاتی اور کریمنل کارروائی کی جائے۔ محکمہ اینٹی کرپشن ان افسران کے خلاف مقدمہ درج کرے اورکارروائی کرے۔

چیف جسٹس آف پاکستان نے پولیس کو ملوث افسران کے خلاف الگ مقدمہ درج کرنے کا حکم دیتے ہوئے آئندہ سماعت پرکریمنل کارروائی کی رپورٹ پیش کرنے کا حکم دیا۔

سپریم کورٹ کراچی رجسٹری میں نسلہ ٹاور کو گرانے سے متعلق کیس کی سماعت میں اٹارنی جنرل نے متاثرین کو معاوضہ ادائیگی کے حکم پرعمل درآمد یقینی بنانے کی استدعا کردی۔

اٹارنی جنرل نے عدالت سے استدعا کی کہ انہدام کے ساتھ زمین کو بھی تحویل میں لینے کا حکم دیا جائے۔ نسلہ ٹاور بلڈر نے تاحال معاوضہ ادائیگی کیلئے اقدامات نہیں کیے۔

دورانِ سماعت کمشنرکراچی نے نسلہ ٹاور انہدام  کیس سے متعلق سپریم کورٹ کو تیسری عمل درآمد رپورٹ جمع کراتے ہوئےعدالت کو بتایا کہ نسلہ ٹاورکو مسمارکرنے پر تیزی سے کام جاری ہے۔

کمشنر کراچی نےسپریم کورٹ کو بتایا کہ نسلہ ٹاور کے مکمل انہدام تک کام جاری رہے گا۔ پانچ فلورز گرا دیے ہیں، چارسومزدورکام کررہے ہیں۔ جس پر چیف جسٹس آف پاکستان نے کمشنرکراچی سے استفسار کیا کہ چارسو لوگوں سے ایک بلڈنگ نہیں ختم ہورہی؟

کمشنر کراچی نے کہا کہ عمارت کے اندرسے اسٹرکچرختم ہوچکا ہے، صرف باہر سے نظرآ رہا ہے۔

چیف جسٹس نے پوچھا کہ آپ نے لکھا سندھ بلڈنگ اتھارٹی نے رکاوٹ ڈالی ہے؟

کمشنر کراچی نے بتایا کہ ہم نے مہذب طریقے سے لوگوں کو روکا ہے۔ آباد نے بھی مظاہرہ کیا ہم نے پرامن طریقے سے معاملہ نمٹایا۔ دفعہ 144 نافذ کرکے لوگوں کو قریب آنے سے روک دیا ہے۔

جسٹس قاضی امین نے کہا کہ مسئلہ یہ ہے کہ اسٹیٹ کی کمزوری سے نان اسٹیٹ ایکٹرمتحرک ہوتے ہیں۔ باٹم لائن یہ ہے کہ بلڈنگ اب بھی کھڑی ہے۔

چیف جسٹس نے ریمارکس میں کہا کہ دنیا میں ایک گھنٹے میں ایسی بلڈنگ گرا دی جاتی ہے، آپ لوگ کیا کررہے ہیں؟

جسٹس قاضی امین نے کہا کہ اگر کوئی مداخلت کررہا ہے تو توہین عدالت ہے۔

ڈی جی ایس بی سی اے نے عدالت کو بتایا کہ ہم نے کوئی رکاوٹ نہیں ڈالی۔ رپورٹ کو چیلنج کرتا ہوں۔  عدالت کے حکم پر ڈی جی ایس بی سی اے نے رپورٹ پڑھ کر سنائی۔

چیف جسٹس نے کہا کہ آپ کو توہینِ عدالت کا نوٹس دے رہے ہیں۔ جواب دیں۔ رپورٹ کے مطابق ایس بی سی اے نے کنٹریکٹر سے رشوت بھی مانگی۔

جسٹس قاضی محمد امین نے کہا کہ عدالتی حکم پر عمل درآمد میں کوئی رکاوٹ برداشت نہیں کریں گے۔

سپریم کورٹ نے ڈے جی اینٹی کرپشن کو ڈی جی ایس بی سی اے کے خلاف مقدمہ درج کرنے کا حکم دیتے ہوئے اینٹی کرپشن کو قانونی کارروائی اور تحقیقات کرکے رپورٹ پیش کرنے کی ہدایت کی۔

سپریم کورٹ نے کمشنرکراچی کو نسلہ ٹاورکا انہدام ایک ہفتے میں مکمل کرنے کا حکم دیتے ہوئے ہدایت کی کہ تمام سرکاری وسائل بروئے کارلائیں۔