بہاولنگر: شہر فرید کے علاقے میں اغوا کے بعد لڑکی سے گن پوائنٹ پر مبینہ زیادتی کا واقعہ پیش آیا ہے۔

پولیس حکام کے مطابق  سولہ سالہ متاثرہ لڑکی اپنے حقیقی بھائی کے ہمراہ موٹر سائيکل پر جا رہی تھی کہ تین کار سوار ملزمان نے اسلحہ کے زور پر اغوا کر لیا۔

پولیس کے مطابق مبینہ طور پر  ایک ملزم نے لڑکی کو کھیتوں میں لے جا کر زبردستی جنسی زیادتی کا نشانہ بنایا، جبکہ دو ملزمان اسلحہ تانے کھڑے رہے۔

پولیس کے مطابق واقعے کے بعد ملزمان فرار ہونے میں کامیاب رہے، جبکہ جاتے جاتے لڑکی کے بھائی کا موبائل فون بھی ساتھ لے گئے۔

پولیس نے مقدمہ درج کر لیا ہے اور متاثرہ لڑکی کو میڈیکل کروانے کیلئے ہسپتال منتقل کر دیا گیا ہے۔

آئی جی پنجاب راؤ سرادر علی خان نے بہاولنگر میں 16 سالہ لڑکی سے اغواء کے بعد مبینہ زیادتی کے واقعے کا نوٹس لے لیا۔

آئی جی پنجاب نے آر پی او بہاولپور سے واقعہ کی رپورٹ طلب کرلی، جبکہ ڈی پی بہاولنگر کو ملزمان کے خلاف مقدمہ درج کرنے اور فوری گرفتار کرنے کے احکامات جاری کر دیئے۔

آئی جی پنجاب کا کہنا ہے کہ خواتین اور بچوں سے زیادتی اور تشدد کرنے والے کسی رعایت کے مستحق نہیں۔ ملزمان کو جلد از جلد گرفتار کرکے قرار واقعی سزا دلوائی جائے۔