جام خان شورو نے کہا ہے کہ واٹر لائینگ میں ہماری 15 اسکیمیں اس سال مکمل ہوں گی۔

 صوبائی وزیر آبپاشی جام خان شورو نے پریس کانفرنس کرتے ہوئے کہا ہے کہ میڈیا جمہوریت کا اہم ستون ہے ، اگست میں مجھے آبپاشی کی وزرات ملی، دنیا کا سب سے بڑا نہری نظام پاکستان میں ہے۔

انہوں نے کہا کہ 21284 کلو میٹر نہریں اور 43 واٹر سورسز، 1900 کلومیٹر مین کینال اور تین بیراجوں پر مشتمل سندھ کا نظام آبپاشی ہے ، جی ڈی پی میں سندھ کے پانی کا شئیر 23 فیصد ہے ، سندھ میں پانی کی کمی کا سامنا ہے ، پیپلز پارٹی کی سندھ حکومت نے آٹھ سالوں میں 3200 کلومیٹر نئی کینال بنائیں۔

صوبائی وزیر آبپاشی نے کہا کہ واٹر لائینگ میں ہماری سولہ اسکیموں میں سے پندرہ اس سال مکمل ہونگی ، تھر کول کے لیے پانی مہیا کرنا ہمارا کام ہے ، 546 ملین روپے تھر کول کی جاری اسکیموں میں خرچ کر رہے ہیں ، 44 چھوٹے ڈیم مکمل کرلیے ہیں ، 16 پر کام جاری ہے۔

جام خان شورو نے کہا ہے کہ ورلڈ بینک کے تحت سندھ بیراج امپروومنٹ پر کام کررہے ہیں ، تین بیراج میں سے کوٹری بیراج اور سکھر بیراج پانی کی کمی سے زیادہ متاثر ہیں ، ارسا سندھ حکومت پر پانی ضایع کرنے کا الزام لگاتا ہے ، بدین ٹھٹھہ اور سجاول پانی کی کمی کے باعث برباد ہورہے ہیں دوسری جانب پنجاب نئی زمینیں آباد کرنے کے لیے نئی کینال بنا رہا ہے۔

انہوں نے کہا کہ موجودہ حکومت نے زراعت تباہ کردی ہے ، زراعت میں لوگ گزارہ نہیں کر پا رہے جب ہی ملک میں لوگ شہری علاقوں کی جانب  منتقل ہورہے ہیں۔