وزیر مملکت برائے اطلاعات فرخ حبیب نے کہا ہے کہ‏ اپوزیشن نے ایوان کو  طوفان بدتمیزی بنائے رکھا۔

وزیر مملکت فرخ حبیب نے وزیر خزانہ شوکت ترین کے ہمراہ پریس کانفرنس کرتے ہوئے کہا کہ ‏پیپلز پارٹی 9 بار اور مسلم لیگ ن 4 بار آئی ایم ایف کے پاس گئی، ان جماعتوں کو بھی پتہ ہے کہ وہ معیشت کو کہاں چھوڑ کر گئے تھے۔

انہوں نے کہا یہ اگر دودھ اور شہد کی نہریں بہا کر جاتے تو یہ صورتحال نہ ہوتی، حکومت نے پوری کوشش کی ہے کہ عام عوام پر بوجھ نہ ڈالا جائے، اپوزیشن نے ایوان کو طوفان بدتمیزی بنائے رکھا۔

وزیر مملکت برائے اطلاعات فرخ حبیب کا مزید کہنا تھا کہ ‏جب موقع آتا ہے شہباز شریف اور بلاول غائب ہوجاتے ہیں، ‏یہ صرف بند کمروں میں باتیں کرتے ہیں۔

دوسری جانب وزیر خزانہ شوکت ترین نے پریس کانفرنس کرتے ہوئے کہا ہے کہ ‏عام آدمی پر صرف 2 ارب روپے کے ٹیکسوں کا بوجھ پڑے گا، مپیوٹرز، سلائی مشینیں، آئیوڈائز نمک اور سرخ مرچ پر ٹیکس لگے گا ، ‏نمک،مرچ سمیت چند چیزوں پر ٹیکس سے عام آدمی متاثر ہوگا۔

شوکت ترین نے کہا کہ ‏بل میں 343 ارب روپے کی ٹیکس چھوٹ پر نظر ثانی کی گئی ہے ، ‏لوگوں پر ٹیکسوں کا بوجھ نہیں پڑے گا، ‏مالیاتی ضمنی بل سے عوام پر بوجھ کی باتیں بے بنیاد ہیں، ایک ‏ہزار سی سی سے زائد گاڑی پر ڈیوٹی بڑھے گی۔

وزیر خزانہ شوکت ترین نے کہا کہ ‏جن چیزوں پر چھوٹ تھی اس پر نظرثانی کی جا رہی ہے ، ‏بتایا جائے 2 ارب روپے سے کون سا بڑا مہنگائی کا طوفان آجائے گا؟ ‏اس وقت ہمارا سیلز ٹیکس 3 ٹریلین کا ہے ، زرعی سیکٹر اور فرٹیلائزرز پر ٹیکس نہیں لگنے دیا۔

انہوں نے کہا کہ سینما کے آلات اور پرانے کپڑوں پر ٹیکس نہیں لگنے دیا ، 70 ارب روپے کی ٹیکس چھوٹ میں لگژری آئٹم شامل تھیں ، آئی ایم ایف نے 7 سو ارب کی ڈیمانڈ کی ہم 343 پر لے کر آئے ، ‏گزشتہ ڈھائی سے اسٹیٹ بینک سے کوئی پیسہ نہیں لے رہے۔

شوکت ترین نے کہا کہ تحریک انصاف کے منشور میں ہے کہ وہ اداروں کو خودمختاری دے گی ، جب تک اداروں میں مداخلت کرتے رہیں گے وہ مضبوط نہیں ہونگے ، آئ ایم ایف نے کہا اسٹیٹ بینک کو بہت بری طرح ٹریٹ کیا جارہا ہے۔

 وزیر خزانہ شوکت ترین نے کہا کہ ‏ آئی ایم ایف کا کہنا ہے کہ حکومت اسٹیٹ بینک سے قرض نہیں لے گی ، اسٹیٹ بینک کی اتھارٹی اس کے بورڈ کے پاس ہو گی ، اسٹیٹ بینک کا بورڈ حکومت ہی بنائے گی ، گورنر کی تعنیاتی حکومت ہی کرے گی۔

انہوں نے کہا کہ ایسا نہیں ہے کہ ہم نے اسٹیٹ بینک کو بیچ دیا ہے ، اسٹیٹ بینک پارلیمنٹ کی قائمہ کمیٹیوں کو جوابدہ ہوگا ، قائمہ کمیٹیوں کو جوابدہ کر کے ہم نے پارلیمنٹ کو تقویت بخشی ہے ، آئی ایم ایف چاہتا تھا کہ گورنر اسٹیٹ بینک کا احتساب نہ ہو۔

شوکت ترین نے کہا کہ ہم آئی ایم ایف کو بتایا کہ یہ آئین پاکستان کے خلاف ہے ، بل میں سے ماوارئے آئین شقوں کو نکال دیا گیا ، آگر اسٹیٹ بینک تجاوز کرنے کی کوشش کرے گا قانون واپس لے لیں گے ، دنیا بھر میں اسٹیٹ بینک خودمختار ادارے ہوتے ہیں ، جس جس نے ان کی بات نہیں سنی ان ممالک کا برا حال ہوتا ہے۔

وزیر خزانہ شوکت ترین نے کہا کہ ترکی میں مہنگائی اور دیگر چیزیں ان کے کنٹرول سے باہر ہوچکی ہیں ، آٹو سیکٹر پر ٹیکسز کا آئی ایم ایف سے کوئی تعلق نہیں، تجارتی خسارے کو مدِ نظر رکھتے ہوئے لگژری آئٹمز پر ٹیکس لگائے۔

انہوں نے کہا کہ امریکہ میں مہنگائی 1 فیصد سے بڑھ کر 6.8 فیصد پر پہنچ گئی، ہماری مہنگائی کی شرح 11 فیصد ہے، اگر جو بائیڈن فیل ہوا تو پھر میں بھی فیل ہوں گا ، تین سے چار درآمدی اشیاء کی قیمتیں بڑھیں جس کے باعث مہنگائی بڑھی۔