کراچی کے علاقے گلشن اقبال میں ملزمان نے بینک سے 3 لاکھ سے زائد رقم لے کر نکلنے والے شہری کو گھر کی دہلیز پرلوٹ لیا۔

گلشن اقبال میں بینک سے رقم لے کر نکلنے والے شہری کو گھر کی دہلیز پر لوٹ لیا گیا، واردات کی سی سی ٹی وی فوٹجز بول نیوز کو موصول ہوگئی۔

فوٹجز میں 2 موٹرسائیکلوں پر سوار 4 ڈاکوٶں کو لوٹ مار کرتے دیکھا جاسکتا ہے، شہری بینک سے رقم لے کر گھر کے گیٹ تک پہنچا تو ڈاکو بھی پیچھا کرتے ہوئے آپہنچے اور شہری سے لوٹ مار کے بعد ملزمان با آسانی فرار ہوگئے۔

یاد رہے اس سے قبل اسی ماہ ہی کراچی میں شہریوں سے لوٹ مار اور ڈکیتیاں کرنے والے ملزم کو گرفتار کیا گیا تھا۔

ایس ایس پی سٹی سرفراز نواز نے بتایا تھا کہ  ڈسٹرکٹ سٹی سے بینک سے رقم لے کر نکلنے والے شہریوں سے لوٹ مار کرنے والا عادی اور پیشہ ور ملزم کو گرفتار کرلیا گیا ہے۔

ایس ایس پی سٹی کا کہنا ہے کہ ملزم کو علاقہ تھانہ کھارادر کی حدود سے گرفتار کیا گیا، ملزم کا نام شاہ زیب ولد عبد الغفور ہے، ملزم سے 1 ہینڈ گرینیڈ برآمد کیا گیا ہے۔

سرفراز نواز نے بتایا کہ ملزم بینک سے رقم لے کر نکلنے والے شہریوں سے ڈکیتی اور لوٹ مار کی متعدد وارداتوں میں ملوث ہے، ملزم 20 اپریل کو ثاقب نامی شہری سے 35 لاکھ 50 ہزار روپے چھین کر فرار ہوگیا تھا۔

انہوں نے کہا کہ ملزم 9 جون کو محمد فرحان نامی شہری سے 5 لاکھ 50 ہزار روپے چھینے، 30 نومبر کو غلام غوث نامی شہری سے 35 لاکھ روپے چھینے اور 13 نومبر کو شہری سے 7 لاکھ روپے چھین کر فرار ہو گیا تھا۔

ایس ایس پی سٹی کے مطابق ملزم کے خلاف اس سے قبل بھی غیر قانونی اسلحے کے 2 مقدمات اور چھینا جھپٹی کا 1  مقدمہ  تھانہ گارڈن میں درج ہے، ملزم اپنے دیگر ساتھیوں کے ساتھ مل کر کھارادر، میٹھادر، شیر شاہ اور گارڈن کے علاقوں میں وارداتیں کیا کرتا تھا۔

ایس ایس پی سٹی سرفراز نواز کا مزید کہنا تھا کہ ملزم کا ساتھی سجاد عرف بچھڑا اس سے قبل گرفتار ہو کر جیل جا چکا ہے۔