پنجاب میں انسداد پولیو مہم کا آج آخری روز ہے۔

تفصیلات کے مطابق 4 دنوں میں 2 کروڑ 17 لاکھ سے زائد بچوں کو پولیو سے بچاؤ کے قطرے پلائے گئے، قطرے پلائے جانے والے بچوں میں مہمان، گلیوں میں پائے جانے والے بچے شامل ہیں۔

ذرائع کے مطابق سب سے زیادہ لاہور میں 19 لاکھ 20 ہزار بچوں کو قطرے پلائے گئے ہیں۔

ذرائع نے بتایا کہ فیصل آباد میں 14 لاکھ 61 ہزار بچوں کو پولیو سے بچاؤ کے قطرے پلائے گئے جبکہ ملتان میں 9 لاکھ 62 ہزار سے زائد بچوں کو قطرے پلائے گئے ہیں۔

اس ضمن میں پنجاب پولیو پروگرام سربراہ سندس ارشاد نے ہدایت دی ہے کہ پولیو ٹیمیں رہ جانے والے بچوں کو ہر حال میں قطرے پلائیں۔

انہوں نے کہا کہ والدین ٹیموں سے بھرپور تعاون کریں، حکومت پولیو کے خلاف مثبت نتائج حاصل کرنے میں کامیاب ہوئی ہے۔

سندس ارشاد نے کہا کہ پنجاب میں رواں سال کے دوران  پولیو کا ایک کیس بھی سامنے نہیں آیا، ماحولیاتی نمونے بہت جلد پولیو کے خاتمے کی نوید سنا رہے ہیں۔

انہوں نے مزید کہا کہ وائرس کے مکمل خاتمے کے لئے کارکردگی کا تسلسل برقرار رکھنا ہوگا، یقینی بنانا ہوگا کہ ایک بھی بچہ ویکسین سے محروم نہ رہے، والدین یقین رکھیں ویکسین مفید اور محفوظ ہے۔