کمشنر لاہور کیپٹن (ر) محمد عثمان نے کہا ہے کہ حضرت عیسی اقوام عالم کیلئے امن ومحبت کے پیغمبر تھے۔

کمشنر لاہور نے کرسمس ڈے اور یومِ ولادت قائد اعظم محمد علی جناح پر پیغام جاری کرتے ہوئے کہا کہ کرسمس ڈے پر پاکستان کی محب وطن مسیحی برادری کو مبارکباد پیش کرتا ہوں۔

ان کا کہنا تھا کہ حضرت عیسی اقوام عالم کیلئے امن و محبت کے پیغمبر تھے، پاکستانی مسیحی برادری کا وطن عزیز کی ترقی اور حفاظت میں نمایاں کردار ہے، بابائے قوم قائد اعظم محمد علی جناح کو پوری قوم سلام پیش کرتی ہے۔

انہوں نے کہا کہ مسلمانان ہند اور اقلیتوں نے قائد اعظم کی قیادت میں اپنے لئے علیحدہ وطن کو حاصل کیا، پاکستان کی ترقی اور خوشحالی کیلئے ہمیں قائد اعظم کی سیرت اور فرمودات پر عمل یقینی بنانا ہوگا۔

کمشنر لاہور کیپٹن (ر) محمد عثمان کا مزید کہنا تھا کہ پاکستانی قائد اعظم کی بصیرت کے مطابق تمام تعصبات کو پس پشت ڈال کر اپنی منزل حاصل کریں گے۔

واضح رہے کہ پاکستان سمیت دنیا بھر میں مسیحی برادری حضرت عیسیٰ علیہ السلام کی ولادت کی مناسبت سے کرسمس کا تہوار منا رہی ہے۔

دنیا بھر کی طرح پاکستان میں بھی کرسمس کے تہوار کا باقاعدہ گزشتہ رات گرجا گھروں میں منعقدہ خصوصی دعائیہ تقریبات سے ہوا۔ صبح ہوتے ہی مسیحی برادری اپنے پیاروں، عزیزوں اور اقارب کو مبارک باد دے رہے ہیں اور روایتی انداز میں تحفے تحائف کا تبادلہ کیا جارہا ہے۔

مسیحی برادری نے اپنے گھروں، محلوں اور عبادت گاہوں کو خصوصی برقی قمقموں، کرسمس ٹریز اور ڈیوڈ اسٹارز سے سجا رکھا ہے۔

دوسری جانب ملک میں دہشت گردی کے خدشات کے پیش نظر سیکیورٹی بھی ہائی الرٹ کی گئی ہے۔