لاہور میں ناصرف اسموگ نے ڈیرے ڈال لئے بلکہ شہری آنکھوں اورسانس کی بیماریوں میں بھی مبتلا ہو رہے ہیں۔

فضائی آلودگی کےاعتبارسے پاکستان کا شہرلاہور آج دنیا کےآلودہ ترین شہروں میں دوسرے نمبر پر آگیا۔

ایئرکوالٹی انڈیکس کے مطابق لاہورکی فضاؤں میں آلودہ ذرات کی مقدار 217 پرٹیکیولیٹ میٹرز ریکارڈ کی گئی۔

ایئرکوالٹی انڈیکس کی درجہ بندی

ایئرکوالٹی انڈیکس کی درجہ بندی کے مطابق 151 سے 200 درجے تک آلودگی مضرِ صحت ہے۔

201 سے 300 درجے تک کی آلودگی انتہائی مضرِ صحت ہوتی ہے جبکہ 301 سے زائد درجہ خطرناک آلودگی کو ظاہر کرتا ہے۔

آج موسم کیسا رہےگا؟

ملک کے بیشتر شہروں میں موسم آج بھی خشک اور شدید سرد رہے گا۔

محکمہ موسمیات کے مطابق اسلام آباد سمیت پنجاب کے بیشتر اضلاع میں موسم خشک اور سرد رہے گا تاہم میدانی علاقوں میں رات سے دوپہرتک شد ید دھند چھا ئی رہے گی۔

محکمہ موسمیات کا کہنا ہے کہ خیبرپختونخواہ کے بیشتر اضلاع میں بھی موسم خشک اور شدید سرد جبکہ بالائی اضلاع میں مطلع جزوی طور پر ابر آلود رہے گا۔

تازہ ترین اپڈیٹ کے مطابق بلوچستان کے بیشتر اضلاع میں موسم شدید سرد اور مطلع ابر آلود رہے گا جبکہ دالبندین، نوشکی،چاغی اورکوئٹہ میں بارش اور پہاڑوں پر برفباری کا بھی امکان ہے۔

اسکے علاوہ سندھ کے بیشتر اضلاع میں موسم خشک اورمطلع جزوی طورپر ابرآلود رہے گا تاہم سکھر، لاڑکانہ، شہید بینظیر آباد، موہنجوداڑو اور گردونواح میں رات اور صبح کے اوقات میں دھند چھائی رہے گی۔

گلگت بلتستان اورکشمیر میں مطلع جزوی ابر آلود رہنے کے ساتھ موسم شدید سرد رہے گا۔