فوادچوہدری نے کہاکہ حکومت گرانےکیلئےعمران خان جیسا بندہ چاہیے۔

وفاقی وزیر اطلاعات فواد چوہدری نے کابینہ اجلاس کے بعد میڈیا کو بریفنگ دیتے ہوئے کہا کہ مولانا فضل الرحمان 3 سال سےحکومت جانےکی تاریخ دےرہےہیں، انہوں نےاپنےکارکنوں کوچورن بھی توبیچنا ہوتاہے۔

انہوں نے کہاکہ دیہاڑی دان سیاستدان دیہاڑی پکڑکربیانات دیتےہیں۔

فوادچوہدری نے کہاکہ نوازشریف نے وطن واپس نہیں آنا،ہم واپس لےکرآئیں گے، حکومت گرانا ان کے بس کی بات نہیں۔

وفاقی وزیرنے کہا کہ اُس وقت بھی کہہ رہاتھا نوازشریف کوباہرنہ جانےدیں واپس نہیں آئیں گے۔

انہوں نے کہاکہ منی بجٹ میں ایڈ جسٹمنٹ کررہےہیں، منی بجٹ بل اسی سیشن میں پاس ہو جائے گا،منی بجٹ بل سےعام آدمی پرکوئی اثرنہیں پڑےگا۔

فواد چوہدری نے کہاکہ نواز،زرداری نےنقصان پہنچایااسی وجہ سےآئی ایم ایف جانا پڑتا ہے، اپوزیشن آئی ایم ایف نہ جانےکاکوئی متبادل ہی بتادے، اپوزیشن کوکچھ پتہ ہی نہیں صرف باتیں کرتےہیں۔

وزیراطلاعات نے کہاکہ سیاستدانوں سے زیادہ کسی اورکا احتساب نہیں،سیاستدان ہی ہیں جن کے  ٹیکس گوشوارےسامنےآتےہیں،سیاستدان اوران کےخاندانوں کےاثاثےسب ہمارےسامنےہیں۔

یہ بھی پڑھیں:  وفاقی کابینہ نےقومی سلامتی پالیسی کی منظوری دیدی

انہوں نے کہاکہ ناظم جوکھیوقتل کیس،تحقیقات کیلئےمشترکہ ٹیم کی منظوری دے دی، ٹیم میں پولیس،انٹیلی جنس ودیگراداروں کےافراد شامل ہونگے، ناظم جوکھیوکےقاتلوں کوبچانےکی کوشش کی گئی۔

وفاقی وزیر اطلاعات نے کہا کہ وفاقی کابینہ نے قومی سلامتی کی پالیسی کی منظوری دے دی ہے۔

انہوں نے کہاکہ پہلی مرتبہ قومی سلامتی کی پالیسی میں جیو اسٹریٹجک پالیسی کے ساتھ اکنامک اسٹریٹجی کو بھی منسلک کیا گیا ہے۔

فواد چوہدری نے کہاکہ جب تک عام آدمی معاشی، سماجی اور قانونی حالت سے مطمئن نہیں ہوگا، ملک کی سیکورٹی کو خطرہ لاحق رہے گا، قومی سلامتی پالیسی میں عام آدمی پر فوکس کیا گیا ہے۔

انہوں نے بتایاکہ 2014 میں اس پالیسی پر کام شروع کیا گیا تھا، 2021 میں اس پالیسی کی منظوری ہوئی، پالیسی کی منظوری میں تقریباً 9 سال لگے، 18 مختلف وزارتوں کا ان پٹ اس میں شامل ہے۔

وفاقی وزیر نے کہاکہ ماضی میں نیشنل سیکیورٹی پالیسی پر نکتہ نظر پر اتفاق نہیں ہوا، پہلی مرتبہ ایک ایسی حکومت برسراقتدار ہے جو تمام نکتہ ہائے نظر کو یکجا کرنے کی صلاحیت رکھتی ہے۔

ان کا کہنا تھا کہ وزیراعظم عمران خان کی قیادت میں پہلی مرتبہ ہم نے ایک اہم سنگ میل عبور کیا ہے، نیشنل سیکورٹی پالیسی کے ساتھ انٹرنل پالیسی اور فوڈ سیکورٹی پالیسی سمیت دیگر وزارتوں کی پالیسیاں بھی منسلک ہیں۔