کراچی میں بارش کے دوران ایڈمنسٹریٹر کے ایم سی سندھ حکومت کے ترجمان و مشیر قانون سندھ بیرسٹر مرتضیٰ وہاب شہر کے دورے پر نکل پڑے ہیں۔

تفصیلات کے مطابق مرتضیٰ وہاب نے ضلع جنوبی کے مختلف علاقوں کا جائزہ لیا، انہوں نے برنس روڈ، پاکستان چوک، صدر، آئی آئی چندریگر روڈ، ایم ای جناح روڈ، نیٹی جیٹی، ماڑی پور روڈ اور دیگر علاقوں کا دورہ کیا جہاں ایڈمنسٹریٹر ضلع جنوبی بیرسٹر مرتضیٰ وہاب کے ہمراہ تھے۔

ایڈمنسٹریٹر کراچی نے بلدیاتی عملے کو نکاسی آب کی ہدایت دیتے ہوئے کہا کہ کہیں بارش کا پانی جمع نہ ہونے پائے، بلدیاتی عملہ سڑکوں پر موجود ہے۔

بیرسٹر مرتضیٰ وہاب کو بریفنگ دی گئی کہ مختلف مقامات پر نکاسی آب کے لئے مشینری موجود ہے۔

ایڈمنسٹریٹر کراچی نے ضلع جنوبی کے بعد ضلع غربی اور ضلع کیماڑی کا دورہ کیا جہاں ایڈمنسٹریٹر ضلع کیماڑی، ایڈمنسٹریٹر جنوبی اور دیگر عملہ بھی موجود تھا، بیرسٹر مرتضیٰ وہاب کو نکاسی آب کے حوالے سے حکام نے بریفنگ دی۔

بیرسٹر مرتضیٰ وہاب نے گفتگو کرتے ہوئے کہا کہ میں نے تینوں اضلاع کے مختلف علاقوں میں صورتحال کا جائزہ لیا، الحمد اللہ تینوں اضلاع سمیت شہر کے دیگر حصوں میں صورتحال کنٹرول میں ہے، پچھلے 7 سے 8 گھنٹوں سے مسلسل بارش ہو رہی ہے۔

  ان کا کہنا تھا کہ ضلع جنوبی، اولڈ سٹی ایریا، ایم اے جناح روڈ اور لیاری سے ہوتا ہوا میں کیماڑی آیا ہوں، صورتحال قابو میں ہے، بلدیاتی عملہ سڑکوں پر موجود ہے اور نکاسی آب کا کام جاری اور ٹریفک رواں دواں ہے۔

بیرسٹر مرتضیٰ وہاب نے گل بائی کے اس مقام کا بھی جائزہ لیا جہاں ماضی میں بارش کا بہت زیادہ پانی جمع ہوتا تھا۔

ایڈمنسٹریٹر کے ایم سی سندھ حکومت کے ترجمان و مشیر قانون سندھ بیرسٹر مرتضیٰ وہاب نے مزید کہا کہ یہاں نئی ڈرینج لائن ڈالنے کے بعد صورتحال کنٹرول میں ہے، پانی جمع ہونے کی شکایات کا بھی ازالہ کیا جارہا ہے۔

واضح رہے کہ کراچی میں پیر کی صبح بارش کا آغاز ہوا، بارش کا یہ سلسلہ اب بھی مختلف علاقوں میں وقفے وقفے سے جاری ہے۔