برطانوی یونیورسٹی بڑھتی ہوئی عمر کے ساتھ عضلات میں کمزوری کا راز جاننے کے لیے رواں ہفتے انسانی پٹھوں کے خلیات خلامیں بھیجے گی۔

برطانیہ کی خلائی ایجنسی کی جانب سے جاری ہونے والی رپورٹ کے مطابق ان خلیات کو جمعرات ( 23 دسمبر) کو فلوریڈا میں کینیڈی خلائی اسٹیشن سے اسپیس ایکس کے خلائی راکٹ فیلکن 9 کے ذریعے بین الاقوامی خلائی اسٹیشن روانہ کیا جائے گا۔

دی مائیکرو ایج اسٹڈی کے نام سے ہونے والے اس مطالعے کی سربراہی یونیورسٹی آف لیورپول کے محققین کر رہے ہیں۔ جس کے لیے یونیورسٹی کی جانب سے 12 لاکھ پاؤنڈ ( 15 لاکھ ڈالر) کے فنڈ بھی جاری کیے گئے ہیں۔

رپوٹ میں بتایا گیا ہے کہ برطانوی محققین اپنی نوعیت کی اس منفرد تحقیق کے ذریعے اس راز سے پردہ اٹھانے کی کوشش کر رہے کہ آخر وہ کیا اسباب ہیں جن کی وجہ سے عمر کے ساتھ ساتھ انسانی عضلات کمزور ہوجاتے ہیں۔

اس بابت ریسرچرز کا کہنا ہے کہ خلا میں خلا بازوں کے عضلات کمزور ہوجاتے ہیں کیوں کہ کشش ثقل نہ ہونے کی وجہ سے حرکت کرنے کے لیے اضافی پٹھے استعمال کرنے کی ضرورت نہیں پڑتی۔ اس تحقیق میں ہم خلا اور زمین پر عضلاتی نسیجوں کے ساتھ ہونے والے عمل کا موازنہ کرنا چاہتے ہیں جس سے ہمیں اس بات کا تعین کرنےمیں مدد ملے گی کہ آخر وہ کیا وجوہات ہیں جن کی بنا پر انسانی عضلات عمر بڑھنے کے ساتھ ساتھ کمزور پڑتے جاتے ہیں۔

یونیورسٹی کا مزید کہنا ہے کہ بین الاقوامی خلائی اسٹیشن پر لیباریٹری میں بنائے گئے عضلاتی خلیوں پر مائیکرو گریویٹی( بہت کم کشش ثقل) میں مختلف تجربات کیے جائیں گے۔ چاول کے دانوں کے برابر ان خلیات کو خصوصی طور پر بنائے گئے چھوٹے تھری ڈی پرنٹڈ ہولڈرز میں رکھا جائے گا۔

خلائی اسٹیشن پر پہنچنےکے بعد انہیں برقی طریقے سے عضلاتی نسیجوں میں بڑھنے کی تحریک دی جائے گی۔ تحقیق کے اگلے مرحلے میں ان خلیات کے نموںوں کو اگلے ماہ مزید تحقیق کے لیے واپس زمین پر بھیجا جائے گا۔