گوگل نے استعمال کنندگان کی لوکیشن شیئر کرنے والی ایپلی کیشن کے لیے وارننگ جاری کردی ہے۔

بی بی سی کے مطابق امریکی ٹیکنالوجی جائنٹ گوگل نے اپنے ایپلی کیشن ڈیویلپرز کو تنبیہ کرتے ہوئے کہا ہے کہ انہیں اپنے استعمال کنندگان کو یہ بات واضح کرنا ضروری ہے کہ وہ HUQ( لوکیشن ڈیٹا فروخت کرنے والی برطانوی کمپنی) کے ساتھ ان کی کون کون سی معلومات شیئر کرتے ہیں۔

گوگل کا کہنا ہے کہ ایسی تمام ایپلی کیشنز جو ہماری وضع کردہ ڈیٹا پالیسی پر عمل درآمد نہیں کریں گی انہیں پلے اسٹور پر پابندی کا سامنا کرنا پڑ سکتاہے۔

گوگل کا یہ بیان اس وقت سامنے آیا ہے جب HUQ نے برطانوی خبر رساں ادارے کے سامنے اس بات کا اعتراف کیا کہ کم از کم دو ایپلی کیشن ہوسٹ استعمال کنندگان کی جانب سے دی گئی لوکیشن شیئرنگ کی اجازت کی خلاف ورزی کرتے ہیں۔

مذکورہ برطانوی فرم کا کہنا ہے کہ ہم اپنے استعمال کنندگان کی ڈیٹا پروٹیکشن کو ’ بہت سنجیدگی‘ سے لیتے ہیں اور ہم امید کرتے ہیں کہ ہمارے تمام شراکت دار کمپلائنس پر عمل درآمد کو یقینی بنائیں گے۔

واضح رہے کہ ایپ شراکت داری اور تھرڈ پارٹیز کو ڈیٹا شیئر کرنے کے حوالے سے دنیا بھر کے پالیسی میکرز اور  ریگولیٹرز کو تحفظات ہیں۔ اور اسی بات کو مدنظررکھتے ہوئے رواں سال اکتوبر میں گوگل نے استعمال کنندگان کے لیے ایک نئی ڈیٹا پالیسی متعارف کراتے ہوئے تمام ایپس کو آگاہ کیا تھا کہ وہ استعمال کنندگان کو یہ بات بتانے کے پابند ہیں کہ وہ ان سے جمع کیے گئے ڈیٹا کو کس طرح استعمال کرتے ہیں۔