سابق جنوبی افریقی کرکٹر فاف ڈوپلیسی، ویسٹ انڈین اسپنر سنیل نارائن اور برطانوی آل راؤنڈر معین علی بنگلہ دیش پریمیئر لیگ کے 8ویں ایڈیشن میں حصہ لیں گے۔

تفصیلات کے مطابق تینوں کھلاڑی بی پی ایل کی دو بار کی چیمپئین کومیلا وکٹورینز کے لیے کھیلیں گے۔

 کومیلا کی منیجنگ ڈائریکٹر نفیسہ کمال نے بھی بنگلہ دیشی میڈیا کو تصدیق کی کہ ان کی ٹیم نے اگلے بی پی ایل سیزن کے لیے ڈو پلیسس، نارائن اور معین کو شامل کیا ہے،یہی وجہ تھی کہ ان کھلاڑیوں نے پاکستان سپر لیگ 7 کے لیے رجسٹریشن نہیں کرائی۔

 تینوں کھلاڑی اس ڈرافٹ کا حصہ بھی نہیں تھے جو گزشتہ اتوار کو ہوا تھا۔

 بی پی ایل کا اگلا سیزن 20 جنوری سے شروع ہوکر 20 فروری تک تقریبا ایک ماہ جاری رہنے کا امکان ہے ۔

دریں اثنا بی پی ایل انتظامیہ کو پی ایس ایل کے ساتھ تصادم سے کوئی سروکار نہیں ہے۔

وہ اس ماہ کھلاڑیوں کے ڈرافٹ کی میزبانی کرنا چاہتے ہیں جس میں ٹیموں کے اسکواڈ میں تین غیر ملکی کھلاڑی ہونے کا امکان ہے، چھ فرنچائزز مقابلے کھیلیں گی۔

 بی پی ایل گورننگ کونسل کے رکن شیخ سہیل نے کہا کہ ہم پی ایس ایل کے بارے میں پریشان نہیں ہیں اور ہم اس مہینے کے پلیئرز ڈرافٹ کی میزبانی کرنے کی توقع کر رہے ہیں لیکن ہمیں صرف ایک چیز جس کی فکر ہے وہ کورونا کی صورتحال ہے۔