لیسکو کے زیر انتطام گرلز ہائی اسکول علامہ اقبال ٹاؤن میں اسپورٹس گالا کا انعقاد کیا گیا جس میں مختلف کھیلوں کے مقابلوں کے ساتھ ساتھ طلباء و طالبات کی جانب سے مختلف رنگانگ ٹیبلوز بھی پیش کئے گئے۔

تفصیلات کے مطابق لیسکو کی جانب سے ایڈمن ڈائریکٹر میاں محمد افضل نے بطور مہمان خصوصی شرکت کی جبکہ ڈپٹی منیجر ایڈمن سلمان حیدر، اسسٹنٹ منیجر توصیف ایاز،پرنسپل گرلز ہائی اسکول علامہ اقبال ٹاؤن راحیلہ رانی، پرنسپل بوائز ہائی اسکول شالامار شجاعت احمدسمیت اساتذہ کی بڑی تعداد بھی موجود تھی۔

طلباء کی جانب سے مہمانانِ خصوصی کے لئے خصوصی مارچ پاسٹ کا مظاہرہ کیا گیا۔

طلباء و طالبات کی جانب سے ریلے دوڑ، رسہ کشی، ایروبک،ہرڈل ریس، باسکٹ بال، چاٹی دوڑ، سکپنگ روپ،فوک ڈانس، بیک ریس، سپون ریس،بلاک ریس، میوزیکل چیئر، ٹگ آف وار سمیت دیگر کئی مقابلوں میں بھرپور کارکردگی کا مظاہرہ کیا گیا۔

 اس موقع پر خطاب کرتے ہوئے ایڈمن ڈائریکٹر میاں محمد افضل کا کہنا تھا کہ طلباء و طالبات کی ذہنی اور جسمانی نشوونما کے لئے اسپورٹس نہایت اہمیت کی حامل ہے،طلباء و طالبات کو نصابی سرگرمیوں کے ساتھ ساتھ غیر نصابی سرگرمیوں میں بھی بھرپور طریقے سے حصہ لینا چاہیے۔

ان کا کہنا تھا کہ اس نوعیت کے ایونٹس دیگر اسکولوں میں بھی منعقدکئے جائیں گے۔

ایڈمن ڈائریکٹر میاں محمد افضل نے تمام اساتذہ کو مخاطب کرتے ہوئے ان سے یہ عہد لیا کہ آپ تمام اپنے مقدس پیشے کو مدنظر رکھتے ہوئے بچوں کی اخلاقی اور تعلیمی تربیت میں کوئی کسر نہ اٹھا رکھیں گے۔

تقریب کے اختتام پر تمام کامیاب طلباء اور طالبات کو انعامات دیئے گئے۔