وزیر منصوبہ بندی اسد عمر نے کہا ہے کہ ٹیکسٹائل سمیت دیگر شعبوں میں چینی سرمایہ کاروں کا اعتماد چاہتے ہیں۔

وزارت منصوبہ بندی میں سی پیک سے متعلق اہم اجلاس ہوا جس میں اسد عمر نے چینی سرمایہ کاروں کو ٹیکسٹائل کے شعبے میں بہتری سے متعلق آگاہ کیا۔

اجلاس میں چینی سرمایہ کاروں کو پاکستان کے ٹیکسٹائل سیکٹر کے بارے میں تفصیلی بریفنگ دی گئی  جبکہ پاکستان کے تقابلی فوائد کے مختلف پہلوؤں کی تفصیلات سے بھی  آگاہ کیا گیا۔

اس موقع پر وزیر منصوبہ بندی اسد عمر  نےکہا کہ ٹیکسٹائل سمیت دیگر شعبوں میں چینی سرمایہ کاروں کا اعتماد چاہتے ہیں، پاکستان میں ٹیکسٹائل کے شعبے میں سرمایہ کاری کے مواقع موجود ہیں

اجلا س میں معاون خصوصی سی پیک امور خالد منصور نےکہا کہ سرمایہ کاری کیلئے سرمایہ کاروں کو سہولیات فراہم کرنے کیلئے اقدامات کئے جارہے ہیں۔

خالد منصور کا مزید کہناتھا کہ سرمایہ کاری کیلئے قانونی فریم ورک کو مزید بہتر بنایا جا رہا ہے ،فریم ورک کے بعد سرمایہ کاروں کو اپنے کام شروع کرنے اور چلانے میں آسانی ہوگی۔

 نمائندہ چائنا چیمبر نےکہا کہ سفری پابندیاں ختم ہوتے ہی سرمایہ کاروں کے دوروں کا اہتمام کیا جائے گا۔

 اجلاس میں وزیر منصوبہ بندی اسد عمر اور معاون خصوصی سی پیک امور خالد منصور نے شرکت کی جبکہ اجلاس میں چائنا چیمبر آف کامرس فار ایکسپورٹ اینڈ امپورٹ کے وفد نے بھی شرکت کی۔