درخواست سینئر صحافی انصار عباسی کی جانب سے اسلام آباد ہائی کورٹ میں جمع کرائی گئی ہے۔ 

اسلام آباد ہائی کورٹ میں درخواست کے ساتھ نجی چینل کی جانب سے غلط خبر چلانے کا اسکرین شاٹ بھی جمع کرایا گیا۔

درخواست میں انصارعباسی کی جانب سے مؤقف اختیار کیا گیا کہ تیرہ دسمبر کی عدالتی کارروائی کو نجی چینل نے غلط رپورٹ کیا۔ کیس کی سماعت کے دوران عدالتی آبزرویشنز اور حقائق کو توڑ مروڑ کر پیش کیا گیا۔

درخواست میں یہ بھی کہا گیا کہ نجی چینل نے میرے حوالے سے چیف جسٹس اطہر من اللہ کے غلط ریمارکس چلائے۔ مجھ سے متعلق چیف جسٹس سے ایسے ریمارکس منسوب کر دیے جو انہوں نے دیے ہی نہیں۔

درخواست میں عدالت کو بتایا گیا کہ نجی چینل نے چلایا کہ انصار عباسی کی جھوٹی خبر نے سچ کو جھوٹ کردیا۔ عدالتی کارروائی کے دوران کمرہ عدالت میں موجود تمام صحافیوں نے اس بات کی نفی کی ہے۔

درخواست میں کہا گیا کہ اسلام آباد ہائی کورٹ جرنلسٹس ایسوسی ایشن کے صدر ثاقب بشیر نے بھی نجی چینل کے دعوی کی نفی کی۔

انصار عباسی نے عدالت سے استدعا کی کہ نجی چینل کی غلط عدالتی رپورٹنگ کا جوڈیشل نوٹس لیا جائے اور اے آر وائی کی جانب سے توہین و ہتک آمیز اورغیرسنجیدہ دعوی پرکارروائی کی جائے۔