کراچی کے علاقے اورنگی ٹاؤن میں پولیس اہلکار کی فائرنگ سے 16 سالہ ارسلان ہلاک ہوگیا ہے۔

تفصیلات کے مطابق واقعے میں زخمی ہونے والے دوست یاسر نے جعلی پولیس مقابلے کا پول کھول دیا ہے۔

زخمی یاسر نے اپنے بیان میں کہا کہ ہم نئی 125 موٹر سائیکل پر کوچنگ سے واپس آ رہے تھے، ہم کم رفتار میں موٹر سائیکل چلا رہے تھے، اس کے دوران سادہ لباس موٹر سائیکل سواروں نے ہمارا راستہ جام کیا۔

یاسر نے بتایا کہ موٹر سائیکل والے نے ہم پر فائرنگ کی، پہلی گولی مجھے لگی، پھر ہم گر گئے، دوسری گولی کسی کو نہیں لگی، تیسری گولی ارسلان کو لگی، ارسلان روڈ پر گرا ہوا تھا، پینٹ شرٹ پہنے ہوئے شخص نے دوبارہ پستول لوڈ کی، میں ڈر کر وہاں سے بھاگا، پھر مجھے نہیں پتا چلا کیا ہوا، ہمارے پاس کوئی اسلحہ نہیں تھا۔

واضح رہے کہ کراچی کے علاقے اورنگی ٹاون میں 2 روز قبل پولیس کی فائرنگ سے نوجوان کی ہلاکت ہوئی تھی۔

ایس ایس پی انوسٹگیشن ویسٹ عابد قائم خانی کا کہنا تھا کہ فائرنگ کے کیس کی تفیش جاری ہے، گرفتار پولیس اہلکاروں کا تفیصلی بیان ریکارڈ کیا جائے گا۔

ان کا کہنا تھا کہ زخمی نوجوان کا بیان کیس میں اہم ہے، نوجوان کا بیان آج ریکارڈ کرنے کی کوشش کریں گے۔

تفیشی ٹیم حکام نے کہا تھا کہ ایس ایچ او سمیت دیگر نفری کا بیان کیس کا حصہ بنایا جائے گا، اسلحے کی فارنسک رپورٹ آتے ہی کیس کی تفیش مزید بہتر ہوگی، متقول ارسلان کے گھر والوں سے رابطہ میں ہیں، اہلکاروں نے ابتدائی بیان میں نوجوان کو ڈکیت کہا تھا۔