کمشنر لاہور نے کہا ہے کہ سال نو پر کسی ناخوشگوار صورتحال سے نمٹنے کیلئے ایڈمنسٹریٹو اور سیکورٹی اقدامات کریں گے۔

کمشنر لاہور کیپٹن ر محمد عثمان کی زیر صدارت نیو ایئر نائٹ پر پورے لاہور ڈویژن میں ایڈمنسٹریٹو و سیکورٹی انتظامات کے حوالے سے اجلاس ہوا جس میں انہوں نے بریفنگ دیتے ہوئے کہا کہ شہریوں کی حفاظت اور ٹریفک روانی کو برقرار رکھنے کیلئے اضافی پولیس نفری تعینات ہوگی۔

انہوں نے کہا کہ نیو ایئر نائٹ پر ہوائی فائرنگ پر پابندی کی خلاف ورزی کرنیوالوں سے سختی سے نمٹا جائیگا ، نیو ایئر نائٹ پر آتشبازی پر پابندی عائد کر دی گئی ہے ، خلاف ورزی پر زیرو ٹالرنس ہے۔

کیپٹن ر محمد عثمان نے کہا کہ ایڈمنسٹریٹو ، پولیس ، ڈالفن ، پی آر یو اور ٹریفک پولیس افسران  فیلڈ میں خود موجود ہونگے ، لاہور پولیس اور رنگ روڈ پولیس مکمل طور پر الرٹ رہیں گے۔

کمشنر لاہور نے کہا ہے کہ پولیس پیٹرولنگ کو بڑھایا جائیگا ، کسی کو طوفان بدتمیزی  پیدا نہیں کرنے دیں گے ، نیو ایئر نائٹ پر آتشبازی کی کسی کو اجازت نہیں ، تمام درخواستیں منسوخ کر دی گئیں۔

واضح رہے کہ اجلاس میں سیکرٹری بلدیات پنجاب نورل امین مینگل ، پنجاب پولیس ، ٹریفک پولیس ، رنگ روڈ پولیس کے افسران اور ڈی سیز نے شرکت کی۔