خانیوال: پاکستان پیپلز پارٹی کے رہنماؤں حیدر زمان قریشی، علی حیدر گیلانی اور نوابزادہ افتخار نے تھانہ سٹی کے باہر پریس کانفرنس میں کہا کہ پاکستان مسلم لیگ (ن) کے کارکنوں نے ہمارے گھر پر مسلح ہو کر حملہ کیا۔

رہنما پیپلز پارٹی نے الزام عائد کرتے ہوئے کہا کہ ہماری خواتین کو زدو کوب کیا گیا، ہم اس بھونڈی حرکت کی مذمت کرتے ہیں ۔

دوران پریس کانفرنس انہوں نے کہا کہ پولیس کو 15 پر اطلاع دی، ہم نے تھانہ سٹی خانیوال میں درخواست دی ہے، لاہور اور ملتان سے بڑے بڑے شیر بن کر آئے ہیں۔

رہنما پیپلز پارٹی نے کہا کہ خانیوال میں پہلے بھی یہ تشدد کرتے رہے ہیں، اس الیکشن کو خونی الیکشن بنانا چاہتے ہیں، خانیوال تبدیل ہو کر بھٹو کا خانیوال ہورہا ہے، یہ پُر امن شہر ہے، پاکستان مسلم لیگ ن غنڈہ گردی کر رہی ہے۔

ان کا مزید کہنا تھا کہ پیسے کی سیاست ن لیگ کررہی ہے، گلوں بٹوں نے ہمارے گھر پر دھاوا بولا، جب تک ان کو کیفر کردار نہیں پہنچایا جاتا ہم تھانے سے باہر نہیں جائیں گے، ایف آئی آر کی کاپی لے کر جائیں گے۔

پی پی رہنماوں کا مزید کہنا تھا کہ کاغذی شیروں نے بزدلانہ حرکت کی، آنے والا وقت پیپلز پارٹی کا ہے، پاکستان مسلم لیگ ن کی لیڈر شپ کو نوٹس لینا چاہیے، تمام پولنگ اسٹیشنز کو حساس قرار دیا جائے، الیکشن کمیشن اس بارے میں نوٹس لے۔