گورنر سندھ عمران اسماعیل نے کہا ہے کہ این آئی بی پروگرام ہمارے ملک کے باصلاحیت نوجوانوں کی شناخت پر کام کرتا ہے۔

عمران اسماعیل نے کراچی یونیورسٹی کے آڈیٹوریم میں نیشنل آئیڈیا بینک کے صوبائی سطح کے مقابلے کی اختتامی تقریب میں شرکت کی جہاں انہوں نے جامعہ کراچی کے وائس چانسلر پروفیسر ڈاکٹر خالد محمود عراقی اور ان کی ٹیم کی کاوشوں کو سراہا۔

اس موقع پر گورنر سندھ نے کہا کہ نیشنل آئیڈیا بینک (NIB)، اکیڈمی، حکومت اور صنعت کے درمیان تعاون کا مقصد ٹیکنالوجی کے استعمال اور کاروبار اور گورننس ماڈلز میں جدت کے ذریعے مقامی مسائل کو حل کرنا ہے۔

انہوں نے کہا کہ آئیڈیا ہنٹنگ کمپیٹیشن کا مقصد صنعتی مسائل اور سماجی چیلنجز کا مؤثر انداز میں حل تلاش کرنا ہے۔

گورنر سندھ کا کہنا تھا کہ این آئی بی پروگرام ہمارے ملک کے باصلاحیت نوجوانوں کی شناخت پر کام کرتا ہے این آئی بی پروگرام کے اسٹیک ہولڈرز تاجروں کو ان کے کاروبار کے فروغ کے لیے مناسب شناخت اور تعاون فراہم کرنے کے لیے تیار ہیں۔

عمران اسماعیل نے کہا کہ صحت مندانہ تعلیمی سرگرمیوں و مقابلوں کی تقریبات یونیورسٹیوں کے مثبت امیج کو بڑھاتے ہیں اور اس طرح کے مقابلے ملک کے صنعتی مستقبل کے لیے مجموعی شراکت پر بھی اہم اثر ڈالتے ہیں۔

بعد ازاں تقریب میں گورنر سندھ عمران اسماعیل نے جیتنے والوں میں نقد انعامات تقسیم کئے اور ان کو بھی مبارکباد بھی دی۔