کراچی میں شہریوں سے لوٹ مار/ ڈکیتیاں کرنے والا ملزم گرفتار ہو گیا ہے۔

تفصیلات کے مطابق ایس ایس پی سٹی سرفراز نواز کا کہنا ہے کہ ڈسٹرکٹ سٹی سے بینک سے رقم لے کر نکلنے والے شہریوں سے لوٹ مار کرنے والا عادی/ پیشہ ور ملزم گرفتار کرلیا گیا ہے۔

ایس ایس پی سٹی کا کہنا ہے کہ ملزم کو علاقہ تھانہ کھارادر کی حدود سے گرفتار کیا گیا، ملزم کا نام شاہ زیب ولد عبد الغفور ہے، ملزم سے 1 ہینڈ گرینیڈ برآمد کیا گیا ہے۔

سرفراز نواز نے بتایا کہ ملزم بینک سے رقم لے کر نکلنے والے شہریوں سے ڈکیتی/ لوٹ مار کی متعدد وارداتوں میں ملوث ہے، ملزم 20 اپریل کو ثاقب نامی شہری سے 35 لاکھ 50 ہزار روپے چھین کر فرار ہوگیا تھا۔

انہوں نے کہا کہ ملزم 9 جون کو محمد فرحان نامی شہری سے 5 لاکھ 50 ہزار روپے چھینے، 30 نومبر کو غلام غوث نامی شہری سے 35 لاکھ روپے چھینے اور 13 نومبر کو شہری سے 7 لاکھ روپے چھین کر فرار ہو گیا تھا۔

ایس ایس پی سٹی کے مطابق ملزم کے خلاف اس سے قبل بھی غیر قانونی اسلحے کے 2 مقدمات اور چھینا جھپٹی کا 1  مقدمہ  تھانہ گارڈن میں درج ہے، ملزم اپنے دیگر ساتھیوں کے ساتھ مل کر کھارادر، میٹھادر، شیر شاہ اور گارڈن کے علاقوں میں وارداتیں کیا کرتا تھا۔

ایس ایس پی سٹی سرفراز نواز کا مزید کہنا تھا کہ ملزم کا ساتھی سجاد عرف بچھڑا اس سے قبل گرفتار ہو کر جیل جا چکا ہے، ملزم کے خلاف مقدمہ درج ہے جبکہ تفتیش جاری ہے۔

واضح رہے کہ ملزم کا مزید سابقہ کریمنل ریکارڈ معلوم کیا جا رہا ہے۔