معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے کہا ہے کہ سری لنکن شہری کے ساتھ ہونے والا واقعہ بہت افسوسناک ہے۔

حسان خاور نے پریس کانفرنس کرتے ہوئے کہا کہ سری لنکا کے شہری کو فیکٹری ورکرز نے نشانہ بنایا، لاش کو سڑک پر لایا گیا اور نذرِ آتش کیا گیا، سری لنکن شہری کے ساتھ ہونے والا واقعہ بہت افسوسناک ہے۔

ان کا کہنا تھا کہ پولیس تفتیش کر رہی ہے، 50 لوگ گرفتار ہو چکے ہیں، سی سی ٹی وی فوٹیج سے شناخت کی جا رہی ہے، 48 گھنٹے میں تفتیش کا نتیجہ سامنے آجائے گا، اس واقعے میں انصاف ہوتا ہوا نظر آئے گا۔

معاون خصوصی وزیرِ اعلیٰ پنجاب برائے اطلاعات و ترجمان حکومت پنجاب حسان خاور نے مزید کہا کہ پہلی 15 کی کال 11 بج کر 26 منٹ پر آئی، پولیس کی کوتاہی سامنے آئی تو کارروائی ہو گی، ایک منٹ کی بھی پولیس کی تاخیر سامنے آئی تو غفلت برداشت نہیں ہو گی۔

  یاد رہے کہ پنجاب کے شہر سیالکوٹ میں ایک انتہائی افسوس ناک واقع پیش آیا جہاں توہین مذہب اور گستاخی پر نجی فیکٹری راجکو انڈسٹری کے جنرل مینیجر کو مشتعل ہجوم نے تشدد کر کے قتل  کر دیا جس کے بعد اس کی لاش کو آگ لگا دی ۔

مظاہرین نے تشدد کرتے وقت لبیک لبیک کے نعرے لگائے جبکہ مشتعل افراد نے فیکٹری کا بھی گراؤ کر لیا اور وزیر آباد روڈ ٹریفک کے لئے بند کر دیا۔

 سیالکوٹ پولیس کا واقعے کے حوالے سے کہنا تھا کہ ہلاک ہونے والے شہری کی شناخت پریا نتھا کمارا کے نام سے ہوئی ہے۔ یہ سیالکوٹ کے وزیر آباد روڈ پر واقع ایک نجی فیکڑی میں بحثیت ایکسپورٹ مینیجر کے خدمات انجام دے رہے تھے۔

اسپتال ذرائع کا کہنا ہے کہ ان کے پاس ایک انتہائی بری طرح جلی ہوئی لاش لائی گئی ہے جو پوری طرح راکھ بن چکی ہے۔

دوسری جانب وزیر اعظم کے معاون خصوصی برائے مذہبی ہم آہنگی علامہ طاہر محمود اشرفی نے کہا ہے کہ میں تمام مکاتب فکر کے علماء کی جانب سے سیالکوٹ واقعے کی مذمت کرتا ہوں۔

علامہ طاہر اشرفی نے میڈیا سے گفتگو کرتے ہوئے کہا کہ انسپکٹر جنرل پولیس یہاں موجود ہیں ابھی تک ایک غلط مقدمہ توہین مذہب کا درج نہیں کیا گیا، ایک سو تیرہ واقعات کی تحقیقات علماء بورڈ کے پاس چل رہی ہیں اس سے قبل 6 مسیحی نوجوانوں کو بھی علماء بورڈ نے تحقیق کر کے بے گناہ ہونے پر اپنے گھر کو بھیجا تھا۔

ان کا کہنا تھا کہ اس طرح کا عمل کرنے والے اسلام کو بدنام کر رہے ہیں، بطورِ مسلمان انہوں نے ہمیں شرمندہ کیا ہے، یہ لوگ دنیا کو اسلام کا کیا چہرہ دکھا رہے ہیں؟ کل ہم تمام مکاتب کے علماء کے ساتھ سری لنکن سفارت خانے میں پریس کانفرنس کریں گے، حکومت کے مطابق ابھی تک اس واقعے میں شامل 50 افراد کو گرفتار کر لیا گیا ہے۔

وزیر اعظم کے معاون خصوصی برائے مذہبی ہم آہنگی علامہ طاہر محمود اشرفی نے مزید کہا کہ پاکستان کے اندر کوئی ایسی جماعت یا فرد نہیں جس نے اس واقعے کی مذمت نہ کی ہو۔