برٹش ایئرویز نے مختصر سفر کیلیے نئی ایئرلائن لانچ کردی جو لوگوں کو 35 مختلف سیاحتی مقامات پر لے جائے گی۔

غیر ملکی خبررساں ادارے کے مطابق برطانوی فضائی کمپنی برٹش ایئرویز نے نئی ایئرلائن لانچ کردی جو لندن کے گیٹ وک ایئرپورٹ سے اڑان بھرے گی اور 35 مختلف سیاحتی مقامات کا رخ کرے گی۔

برطانوی فضائی کمپنی نے نئی ایئرلائن کا نام ’برٹش ایئرویز‘ ہی رکھا ہے لیکن اس کے لیے علیحدہ ٹیم تشکیل دی جائے گی اور برٹش ایئرویز سے اس کا کوئی واسطہ نہیں ہوگا، یہاں تک کہ وہ اپنے فیصلے لینے میں بھی آزاد ہوگی جب کہ نئی ایئرلائن  صرف مختصر مقامات کا سفر کرے گی۔

خیال رہے برٹش ایئرویز نے مارچ 2019 (کورونا وبا) کے ابتدا سے ہی لندن کے گیٹ وک ایئرپورٹ سے اپنی مختصر فلائٹس معطل کردی تھیں جس کی بنیادی وجہ کمپنی کا خسارہ تھا جو اسے یہاں سے اڑان بھرنے میں مل رہا تھا تاہم اب فضائی کمپنی نے صرف 35 مقامات کے سفر کا فیصلہ کیا ہے۔

رپورٹ کے مطابق نئی برٹش ایرویز یونان کے دارالحکومت ’ایتھنز‘ ، جرمنی کے دارالحکومت ’برلن‘، اسپین کے جزیرے ’ابیزا‘ کے علاوہ ’میڈرڈ‘ ، ’مراکش‘ اور دیگر بڑے شہروں کا رخ کرے گی۔

فضائی کمپنی کے ترجمان نے کہا کہ ابتدائی طور پر ایک مقام کے سفر کے لیے 39 یورو (7 ہزار 844 پاکستانی روپے) کا ٹکٹ رکھا گیا ہے جو مختلف مقامات کے لیے الگ الگ ہوگا اور دو طرفہ ٹکٹ کی قیمت بھی الگ ہوگی۔

برٹش ایئرویز کے چیف ایکزیکٹو سین ڈوئلے کا کہنا تھا کہ ہمارے لیے یہ تاریخی لمحہ ہے ، ہماری فضائی کمپنی کے بینر تلے مختصر فلائٹس کا مطلب برطانیہ کے لوگوں اور خاص طور پر گیٹ وک کے کسٹمرز کے لیے کم قیمت میں زیادہ سہولیات فراہم کرنا ہے ، جو ہم نے کردکھایا ہے۔

واضح رہے دنیا بھر کی دلچسپ سیاحتی مقامات کے لیے برٹش ایئرویئرز کی نئی فلائٹس کا آغاز اگلے سال مارچ میں ہوگا۔