ترجمان دفترخارجہ نے کہا ہے کہ اقوام متحدہ سلامتی کونسل قرارداد ضرورت مند افغان عوام کیلئے مثبت قدم ہے۔

اپنے ایک بیان میں ترجمان دفترخارجہ عاصم افتخار احمد نے افغانستان کی امداد بارے سلامتی کونسل کی قرارداد کی منظوری کا خیرمقدم کیا اور کہا کہ اقوام متحدہ سلامتی کونسل کی قرارداد 2615 کا اتفاق رائے سے منظور ہونا خوش آئند ہے۔

انہوں نے کہا کہ ثابت ہوا کہ افغان عوام کی انسانی امداد سلامتی کونسل پابندیوں کی خلاف ورزی نہیں۔

ترجمان دفترخارجہ کا کہنا تھا کہ یہ قرارداد انتہائی نازک وقت پر سامنے آئی، یہ قرارداد عالمی برادری کی افغان عوام کی مدد کے لیے فوری ردعمل کی عکاس ہے۔

انہوں نے کہا کہ افغان عوام کئی دہائیوں کے تنازعات کے باعث بے پناہ نقصان اٹھا چکے ہیں، یہ پاکستان میں او آئی سی کے غیر معمولی وزارتی اجلاس کی منظور کردہ قرارداد کی عکاس ہے۔

ترجمان دفترخارجہ نے کہا کہ پاکستان افغانستان کی ہر ممکن تیز تر انسانی، بحالی، تعمیرنو، ترقی، تکنیکی، مادی امداد کا مطالبہ کرتا ہے، اقوام متحدہ سلامتی کونسل قرارداد ضرورت مند افغان عوام کے لیے درست سمت میں مثبت قدم ہے۔

عاصم افتخار احمد نے کہا کہ تمام ممالک اقوام متحدہ ایجنسیاں، تنظیمیں، عالمی مالیاتی ادارے افغان عوام کی تیز تر مدد یقینی بنائیں۔

ترجمان دفترخارجہ عاصم افتخار احمد کا مزید کہنا تھا کہ او آئی سی مطالبے کے مطابق اب افغان عوام کا ان کی معیشت، منجمد اثاثے بحال کیے جائیں، پاکستان پُرامید ہے کہ عالمی برادری افغان عوام کی دل کھول کر مدد کریں گے۔

 واضح رہے اس سسے قبل اقوام متحدہ کی سیکیورٹی کونسل نے افغانستان کے لئے انسانی امداد کی قرارداد منظور کرلی، اس بات کا اعلان اقوام متحدہ میں پاکستان کے مستقل مندوب نے ہیڈ کوارٹر میں ایک پریس کانفرنس کے ذریعے کیا تھا۔

اقوام متحدہ میں پاکستان کے مستقل مندوب منیر اکرم نے کہا تھا کہ اس قرارداد کی منظوری سے پاکستان کے موقف کی تائید ہوئی، قرارداد کی منظوری کے بعد افغانستان کو امداد کے حوالے سے قانونی پیچیدگیاں ختم ہو گئی ہیں۔

ان کا کہنا تھا کہ پاکستان کہتا رہا ہے کہ افغانستان کو بنیادی اشیائے ضرورت کے لئے امداد فراہم کرنا بین الاقوامی قوانین کی خلاف ورزی نہیں۔

اقوام متحدہ میں پاکستان کے مستقل مندوب نے کہا تھا کہ سیکیورٹی کونسل میں قرارداد امریکا نے پیش کی۔ پاکستان چین اور روس نے اس قرارداد کے حوالے سے ممبر ممالک کے ساتھ روابط کئے، قرارداد کی منظوری سے افغانستان کو فوری طور پر امداد کے لئے جمع کی گئی رقم ادا کی جا سکے گی۔

منیر اکرم کا مزید کہنا تھا کہ افغان حکومت بھی اپنے رویے میں بہتری لائے گی اور لا بھی رہی ہے، قرارداد کی منظوری افغانستان کے مستقبل کے لئے بہت اہم ہے۔