امریکی صدر جوبائیڈن نے کہا ہے کہ اومی کرون کے امریکا میں تیزی سے پھیلنے کے امکانات ہیں۔

صدر جوبائیڈن نے جاری کردہ بیان میں کہا کہ اومی کرون سے بچنے کیلئے امریکی شہری ویکسین اور بوسٹرز لگوائیں کیوںکہ اومی کرون سے بچاو صرف ویکسین لگانے سے ممکن ہے۔

یہ بھی پڑھیں: برطانیہ ایک مرتبہ پھر کورونا کی لپیٹ میں، یومیہ ریکارڈ مثبت کیسز

برطانیہ میں کورونا وبا نے سنگین صورت حال اختیار کرلی ہے اور گزشتہ روز ملک میں ایک دن کے دوران ریکارڈ کورونا مثبت کیسز سامنے آئے ہیں۔

برطانیہ میں ایک دن کے دوران 88 ہزار کے لگ بھگ کورونا مثبت کیسز سامنے آئے ہیں ، اس سے قبل ایک دن میں سب سے زیادہ 78 ہزار 610 کیسزرواں برس جنوری میں رپورٹ ہوئے تھے۔

برطانیہ کی 6 کروڑ 70 آبادی میں سے ایک کروڑ 10 لاکھ سے زائد افراد اب تک اس وبا کا شکار ہوچکے ہیں۔

ماہرین کا کہنا ہے کہ برطانیہ میں نئے مریضوں کی تعداد میں حالیہ اضافے کی بڑی وجہ کورونا کی نئی قسم اومی کرون کا پھیلاؤ ہوسکتا ہے، جس کے بارے میں برطانوی وزیر اعظم پہلے ہی خبردار کرچکے ہیں۔

خیال رہے کہ دنیا بھر کے تقریباً 77 ممالک میں اومی کرون ویرینٹ کے کیسز رپورٹ ہوچکے ہیں۔

سائنسدانوں کا کہنا ہے کہ اومی کرون جنوبی افریقا میں کورونا کی ڈیلٹا قسم سے زیادہ تیزی سے پھیل رہا ہے۔ ڈیلٹا کے مقابلے میں بیماری دوبارہ لاحق ہونے کا خدشہ بھی 3 گنا زیادہ ہے۔