اسد عمر نے کہا ہے کہ سی پیک چین اور پاکستان کے درمیان اقتصادی تعلقات کا سنگ بنیاد ہے۔
وفاقی وزیر برائے منصوبہ بندی ترقی اسد عمر نے چین پاکستان اقتصادی راہداری کے پہلے مرحلے میں شاندار کارکردگی کا مظاہرہ کرنے والے 27 پاکستانی کارکنان اور اہلکاروں میں ایوارڈ تقسیم کرنے کیلئے چینی سفارتخانے میں منعقدہ ایک پروقار تقریب سے خطاب کرتے ہوئے کہا کہ سی پیک کے تحت بیشتر منصوبے 2021ء میں اختتام کے قریب ہیں، کوویڈ -19 کے باوجود سال 2021 میں سی پیک میں نمایاں پیش رفت دیکھنے میں آئی ہے۔
انہوں نے کہا کہ صنعتی تعاون کیلئے تشکیل دیئے گئے مشترکہ ورکنگ گروپ کے ثمرات سامنے آنا شروع ہوگئے ہیں جو فیصل آباد میں علامہ اقبال خصوصی اقتصادی زون، خیبرپختونخوا میں رشکئی اور سندھ میں دھابیجی کے خصوصی اقتصادی زون کی شکل میں زیر تعمیر ہیں۔
وفاقی وزیر نے کہا کہ سی پیک پاکستان کی مجموعی ترقیاتی حکمت عملی کا ایک میگا پراجیکٹ ہونے کے ساتھ ساتھ چین اور پاکستان کے درمیان اقتصادی تعلقات کا سنگ بنیاد ہے۔
اسد عمر کا کہنا تھا کہ پاکستان نے خصوصی اقتصادی زونز میں سرمایہ کاری کے عمل کو نہ صرف چینی کمپنیوں بلکہ دیگر بین الاقوامی سرمایہ کاروں کے لئے بھی آسان بنایا ہے۔
انہوں نے کہا کہ سی پیک نہ صرف پاکستان اور چین کے درمیان تعلقات کے معیار کا ثبوت ہے بلکہ سی پیک منصوبوں کی تکمیل ہمارے مضبوط بندھن اور عزم کا ثبوت ہے
اسدعمر نے کہا کہ صدر شی جن پنگ کا ممالک کے درمیان روابط اور مشترکہ خوشحالی کے ذریعے خوشحالی کو بڑھانے کا وژن دنیا کے لیے ایک قابل ذکر نمونہ ہے۔
وفاقی وزیر برائے منصوبہ بندی ترقی واصلاحات و خصوصی اقدامات اسدعمر کا مزید کہنا تھا کہ سی پیک کے مخالفین نہ صرف الفاظ کے ذریعے سی پیک کی مخالفت کر رہے ہیں تاہم پاکستان مؤثر حفاظتی اقدامات کر رہا ہے اور دہشت گردی کی کارروائیوں سے سی پیک کا کوئی منصوبہ متاثر نہیں ہوا ہے۔
چین کے سفیر نونگ رونگ نے تقریب سے خطاب کرتے ہوئے کہا کہ اس سال چین اور پاکستان کے درمیان سفارتی تعلقات کے قیام کی 70ویں سالگرہ ہے، وبائی چیلنج کے باوجود سی پیک منصوبے نے بڑی کامیابی حاصل کی ہے۔
انہوں نے کہا کہ 26 اکتوبر کو چینی صدر شی جن پنگ نے وزیراعظم عمران خان کے ساتھ ٹیلیفون پر ہونیوالی گفتگو کے دوران سی پیک کے منصوبے باہم مل کر مکمل کرنے کے عزم کا اظہار کیا جبکہ دونوں رہنماؤں نے صحت، صنعتی، تجارتی، ڈیجیٹل اور گرین کوریڈورز کی جامع تعمیر کے اپنے عزم کا اعادہ کیا تاکہ سی پیک کو بیلٹ اینڈ روڈ انیشی ایٹو کے اعلیٰ معیار کی ترقی کے لیے ایک عملی منصوبے کے طور پر بنایا جا سکے۔
نونگ رونگ کا کہنا تھا کہ وزیراعظم عمران خان سی پیک کو بہت اہمیت دیتے ہیں، پاکستان کی حکومت نے سی پیک کے مسائل کو مربوط اور حل کرنے کے لیے چین پاکستان تعلقات کی اسٹیئرنگ کمیٹی قائم کی ہے۔
چین کے سفیر نونگ رونگ کا مزید کہنا تھا کہ سرمایہ کاری کی سہولت کے لیے سی پیک کے لیے خصوصی ویزا پالیسی متعارف کرائی، حفاظتی اقدامات کو مضبوط بنانے کے لیے ایک غیر ملکی قومی سلامتی سیل قائم کریں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News