سال نو پر امن عامہ کی فضاء یقینی بنانے کیلئے وزیراعلیٰ پنجاب سردار عثمان بزدار نے انسپکٹر جنرل پولیس کو ضروری ہدایات دی ہیں۔

وزیراعلیٰ سردار عثمان بزدار نے انسپکٹر جنرل پولیس کو ہدایت دی ہے کہ سال نو پر ہوائی فائرنگ اورہلڑ بازی کرنے والے افراد کے خلاف بلاامتیاز کارروائی کی جائے۔

انہوں نے کہا کہ ہوائی فائرنگ کرنے والوں کے خلا ف بلاتفریق قانونی کارروائی کی جائے اور ایسے افراد کو جیلوں میں ڈالا جائے۔

عثمان بزدار نے کہا کہ پولیس ہوائی فائرنگ اور ہلڑ بازی کے واقعات روکنے کیلئے پیشگی موثر اقدامات اٹھائے۔

مزید پڑھیں: پنجاب پولیس نے سال نو کے موقع پر سیکیورٹی پلان تشکیل دے دیا

وزیراعلیٰ پنجاب نے کہا کہ آر پی اوز، سی پی اوز اور ڈی پی اوز اس ضمن میں جامع حکمت عملی وضع کریں۔

انہوں نے مزید کہا کہ عوام کے جان و مال کے تحفظ کیلئے پولیس جانفشانی سے فرائض سرانجام دے۔

ہوائی فائرنگ کون لوگ کرتے ہیں؟

 ہوائی فائرنگ کا رجحان دیہاتوں اور شہروں دونوں میں یکساں موجود ہے، کچھ عرصہ قبل سمجھا جاتا تھا کہ یہ غیر قانونی عمل کرنے والے ان پڑھ گوار صرف دیہاتی لوگ ہوتے ہیں، جہاں بندوقوں اور گولیوں کی دستیابی کوئی انوکھی بات نہیں۔

مگر چند سالوں میں یہ رجحان شہروں میں بھی کینسر کی طرح پھیل چکا ہے، اور اچھے خاصے خاندان کے پڑھے لکھے نوجوان بھی اس ناجائز عمل کا حصہ بن رہے ہیں، مگر ایک بات تو صاف ظاہر ہے کہ ہوائی فائرنگ کرنا کسی غریب کے بس کی بات نہیں، غریب تو اپنا پیٹ مشکل سے پالتا ہے، اس کے پاس اتنا پیسہ کہاں سے آئے گا کہ وہ کلاشنکوف اور گولیاں خریدے؟ یا فائرنگ کے فیسٹیول کروائے؟ یہ ناجائز عمل یقیناً امیروں کا ہی شوق ہے۔

خاص طور پر وہ امیر افراد جو بااثر بھی ہوں اور جنہیں اکثر پولیس یا انتظامیہ کی سرپرستی حاصل ہوتی ہے، تب وہ یہ جان لیوا عمل بغیر کسی ہچکچاہٹ کے کرتے ہیں۔