صدر مملکت نے کہا ہے کہ تعمیراتی شعبے کو سہولت فراہم کرنے سے روزگار کے بہت سے مواقع پیدا ہوں گے۔

صدر مملکت ڈاکٹر عارف علوی نے کراچی چیمبر آف کامرس اینڈ انڈسٹریز میں 17ویں “مائی کراچی نمائش” کی افتتاحی تقریب سے خطاب کرتے ہوئے کہا کہ ملک بھر کے نوجوانوں کو ہنر پر مبنی تربیت فراہم کرنا حکومت کے اولین مقاصد میں سے ایک ہے تاکہ روزگار اور کاروباری صلاحیت کو بڑھایا جا سکے۔

انہوں نے کہا کہ حکومت نے خواتین اور معذور افراد کے لیے مالی اور قرض کی سہولیات متعارف کرائی ہیں تاکہ جامع ترقی کو یقینی بنایا جا سکے۔

ڈاکٹر عارف علوی کا کہنا تھا کہ تعمیراتی شعبے کو سہولت فراہم کرنے سے صنعت کی ترقی کے ساتھ ساتھ روزگار کے بہت سے مواقع بھی پیدا ہوں گے۔

صدر مملکت نے گرین لائن منصوبے کے حوالے سے کہا کہ یہ منصوبہ اس شہر کے لوگوں کو آرام دہ اور وقت کی بچت کی حامل سفری سہولت فراہم کرے گا۔

ڈاکٹر عارف علوی نے کراچی میں پانی کے مسئلے کا ذکر کرتے ہوئے کہا کہ K4 منصوبے کا مقصد شہر کی روزانہ پانی کی ضرورت کو پورا کرنا ہے، امید ہے کہ یہ 2023 تک مکمل ہو جائے گا۔

صدر مملکت ڈاکٹر عارف علوی نے کراچی میں پائیدار کاروباری ترقی اور نمو کے لیے جامع منصوبہ بندی پر زور دیتے ہوئے کہا کہ سب سے زیادہ ریونیو اور ٹیکس کے حامل اس شہر کے بنیادی انفراسٹرکچر میں بہتری کی ضرورت ہے، تاجر برادری چوتھے صنعتی انقلاب کے ثمرات حاصل کرنے کے لیے آئی ٹی کے شعبے میں سرمایہ کاری کرے۔