خیبرپختونخوا کے 17 اضلاع میں بلدیاتی انتخابات کا انعقاد کیا گیا جن میں پشاور، نوشہرہ، چارسدہ، خیبر، مہمند، مردان، صوابی، کوہاٹ، کرک، ہنگو، بنوں، لکی مروت، ڈیرہ اسماعیل خان، ٹانک، ہری پور، بونیر اور باجوڑ شامل ہیں جب کہ ان انتخابات کے دوران مختلف علاقوں میں فائرنگ کے واقعات بھی رپورٹ کیے گئے ہیں جن میں مجموعی طور پر 3 افراد جان کی بازی ہار گئے ہیں۔

کرک میں فائرنگ

کرک کے تحصیل تحت نصرتی کے گاؤں حدہ بانڈہ کے فقیر خیل میں فائرنگ ہوئی جس کے نتیجے میں 1 شخص جاں بحق جبکہ 4 افراد زخمی ہوچکے ہیں۔

ریسکیو ذرائع کا کہنا ہے کہ کرک فائرنگ کا واقعہ کرک سے پی ٹی أئی کے ایم این اے شاہد خٹک کے گھر قریب ہوا ہے۔

لکی مروت میں فائرنگ

لکی مروت کے پولنگ اسٹیشن سمندر میں ووٹنگ کے دوران فائرنگ سے 1 شخص جاں بحق ہوگیا ہے۔

یہ وقوعہ پولنگ کے اندر رونما ہوا اور ملزمان فرار ہونے میں کامیاب ہو گئے۔

خیال رہے کہ مقتول کی لاش مقامی اسپتال منتقل کردیا ہے۔

چارسدہ میں فائرنگ

چارسدہ کے علاقے طارق آباد میں اے این پی اور کیو ڈبلیو پی کے کارکنوں کے مابین فائرنگ کا تبادلہ ہوا۔

پولیس ذرائع کا کہنا ہے کہ فائرنگ سے اے این پی کے ایک کارکن زخمی ہو گئے جبکہ اس واقعے کے بعد پولنگ دوبارہ شروع کردی گئی۔

پولیس ذرائع نے بتایا کہ پولیس نے قومی وطن پارٹی کے تین کارکنوں کو گرفتار کر لیا ہے۔

ڈیرہ اسماعیل خان میں فائرنگ

ڈیرہ اسماعیل خان (ڈی آئی) کے گرہ حیات میں پولنگ اسٹیشن میں 2 گروپوں میں تصادم ہوا۔

دونوں گروپوں میں فائرنگ کا تبادلہ بھی ہوا جس کے باعث 2 افراد زخمی ہوگئے۔

پولیس کا کہنا ہے کہ گرہ حیات مزید پولیس نفری روانہ کردی گئی ہے۔

صوابی میں فائرنگ

صوابی کالو خان میں سیاسی پارٹیوں کے کارکنان میں فائرنگ سے 3 افراد زخمی ہوگئے۔

ضلع خیبر میں فائرنگ

ضلع خیبر کی سب تحصیل ملاگوری میاں مورچہ میں پولنگ اسٹیشن میں پولیس کی جانب سے ہوائی فائرنگ کی گئی ہے جس کے باعث پولنگ کا عمل رک دیا گیا ہے۔