وزیر خارجہ مخدوم شاہ محمود قریشی نے ایچی سن کالج کا دورہ کیا ہے۔

تفصیلات کے مطابق وزیر خارجہ نے لاہور میں اپنی مادر علمی ایچی سن کالج کا دورہ کیا، سفراء کی ایک کثیر تعداد بھی اس موقع پر موجود تھی، کالج کے پرنسپل مسٹر تھامسن نے وزیر خارجہ کا خیر مقدم کیا۔

کالج انتظامیہ کی جانب سے وزیر خارجہ و دیگر مہمانوں کے اعزاز میں ناشتے کا اہتمام کیا گیا، وزیر خارجہ نے پرتپاک خیر مقدم اور پر خلوص میزبانی پر کالج انتظامیہ کا شکریہ ادا کیا۔

 دوسری جانب وزیر خارجہ مخدوم شاہ محمود قریشی نے ثقافتی ریلی سے ٹیلی فونک خطاب کیا جس میں ان کا کہنا تھا کہ میں سندھ کی عوام کو کلچر ڈے پر مبارکباد پیش کرتا ہوں، مراد سعید آج نئے منصوبوں کا بنیاد رکھنے آئے ہیں جس سے اس ضلعے میں بہتری آئے گی۔

ان کا کہنا تھا کہ ہماری خواہش ہے کہ سندھ کے پسماندہ علاقوں کو ان کا حق دیں، عرصہ دراز سے حکمران رہنے والوں نے توجہ نہیں دی، ہم یہاں تبدیلی کے خواہاں ہیں، گورنر سندھ عوام کے مسائل سن رہے ہیں۔

واضح رہے کہ وادی سندھ کی صدیوں پرانی تہذیب کو فروغ دینے کے لیے آج سندھ کا ثقافتی دن روایتی جوش و جذبے کے ساتھ منایا جا رہا ہے، اس دن کو منانے کے لیے صوبے بھر میں سرکاری اور غیر سرکاری سطح پر مختلف پروگرام منعقد کیے گئے ہیں۔

عوام کی جانب سے ثقافتی دن پر مختلف مقامات سے ریلیوں کا بھی انعقاد کیا گیا ہے، لوگ سندھ ٹوپی اور اجرک پہن کر سندھ ثقافتی میوزک پر جھوم رہے ہیں اور بچوں کی موج مستیاں بھی جاری ہیں۔

 خیال رہے کہ ثقافتی تقریبات میں تقاریر، ٹیوز، اسٹیج ڈراماز اور سندھی فنکار اپنے فن کا مظاہرہ کریں گے۔