جاپان نے ملک واپس لوٹنے والے اپنے شہریوں کی حفاظتی اقدامات کے تحت مزید قرنطینہ مراکز قائم کرنے کا اعلان کر دیا ہے۔

جاپان کے وزیر صحت نے کورونا وائرس کے نئے ویرئینٹ اومیکرون سے بچاؤ کے لئے جاپان واپس آنے والے اپنے شہریوں کے لئے 13 ہزار کمروں پر مشتمل مزید قرنطینہ سینٹرز کا انتظام کر لیا ہے۔

وزیر صحت گوتوشیگے یوگی نے صحافیوں سے گفتگو کرتے ہوئے کہا کہ پہلے سے قائم قرنطینہ کمروں مزید 2 ہزار نئے کمروں کا اضافہ کر دیا گیا ہے۔

جاپان کی حکومت نے وطن واپس لوٹنے والے اپنے شہریوں اور غیرملکی سے کہا ہے کہ وہ قرنطینہ سینٹرز میں 3 سے 10 یوم تک لازمی قیام کریں تاکہ اس وبائی مرض کو ملک میں پھیلنے سے روکا جا سکے۔

حکومت جاپان نے 3 سے 10 روز کی قرنطینہ کی لازمی رہائش کو جاپان آنے والے مسافروں کے بیرون ملک قیام اور خطے میں وائرس کی صورتحال سے منسلک کیا ہے۔

دوسری جانب خدشہ ظاہر کیا جا رہا ہے کہ رواں سال کے اختتام پر تعطیلات کے دوران ملک لوٹنے والوں کی تعداد زیادہ ہو سکتی ہے جس کی وجہ سے قرنطینہ مراکز میں رہائش کی گنجائش بھی کم پڑ سکتی ہے۔

وزیر صحت نے مقامی بلدیاتی اداروں کو اپنے علاقوں میں قائم قرنطینہ مراکز میں سہولتوں کی فراہمی اور گنجائش کو مزید بڑھانے کے لئے ہنگامی بنیادوں پر کام کرنے کا کہا ہے۔