پیاز ایک ایسی سبزی ہے جس کے بغیر شاید ہی پکوان تیار کیا جاتا ہو، یہ کھانوں کا ذائقہ ہی نہیں بڑھاتی ہے بلکہ اس کے اندر کئی ایسے اجزاء پائے جاتے جو بہت سے امراض کے علاج میں بھی مدد فراہم کرتے ہیں، اسی طرح اس کا رس بھی اپنے اندر ایسے خواص رکھتا ہے جو جلد اور بالوں کی صحت کے لئے اہم تصور کئے جاتے ہیں۔

جلد کے لئے

پیاز کا رس جلد کے کئی مسائل اور اسے صحت مند رکھنے میں بہترین تصور کیا جاتا ہے،یہ چہرے کے نشانات دور کرنے اور اس کی چمک بڑھانے کے لئے بہت مفید ہے۔ پیاز کے رس میں وٹامن اے،سی اور ای جیسے انٹی آکسیڈینٹ وافر مقدار میں پائے جاتے ہیں جو جلد کے لئے انتہائی مفید ہیں۔جاتے ہیں پیاز کے رس کو کس طرح جلد پر استعمال کیا جائے تاکہ یہ صحت مند رہے۔

رنگت نکھارنے کے لئے

اگر آ پ کا چہرہ اپنی شادابی کھو بیٹھا ہے تو آپ دل چھوٹا نہ کریں،ایک پیاز کو بلینڈر میں ڈال کر بلینڈ کریں پھر کسی کپڑے سے چھان کر اس کا عرق نکال لیں،اب اسے چہرے پر لگائیں اور بیس منٹ بعد چہرہ دھو لیں،اسے روز استعمال کریں۔یہ جلد پر مہاسوں اور سیاہی کو صاف کر کے رنگت نکھارے گا،اور ساتھ ہی جھریوں کو بھی دور کر دے گا۔

بالوں کے لئے

پیاز کا رس بالوں کے لئے بے حد مفید ہے کیو نکہ اس میں سلفر کا فی مقدار میں پایا جاتا ہے یہ مختلف انزائمز اور پروٹین کی پیداوار کے لئے بہت ضروری ہے بال کیراٹین سے بنے ہو تے ہیں اور کیراٹین کا اہم جز سلفر بھی ہے اسی بنا پر پیاز کا رس بالوں کی نشوونماکے لئے بہترین تصور کیا جاتا ہے۔

پیاز کے رس کے لئے دو درمیانے سائز کی پیاز لے کر اسے بلینڈر میں بلینڈ کر لیں اور کسی کپڑے سے چھان کراس کا رس نکال لیں۔

کچھ لوگوں میں پیاز کا رس براہ راست سر میں لگانے سے خارش یا جلن ہو سکتی ہے اس لئے اسے کسی تیل یا ایلوویرہ جیل کے ساتھ استعمال کرنا چاہئے۔

 اس طرح نہ صرف اس کی افادیت میں اضافہ ہوگا بلکہ سر کی جلد جلن اور خارش جیسی کیفیات سے بھی محفوظ رہے گی،پیاز کی بو کو دور کرنے کے لئے اس میں کسی خوشبو دار تیل کے چند قطرے شامل کیے جاسکتے ہیں اس طرح بو سے پاک بہترین مکسچر تیار ہو جائے گا۔

پیاز اور انڈہ

ایک کھانے کا چمچ پیاز کا رس اور ایک انڈہ ملا کر اچھی طرح پیسٹ تیار کریں،اسے سر میں لگا ئیں اور بیس سے تیس منٹ بعد شیمپو لگاکر ٹھنڈے پانی سے دھو لیں۔اسے ہفتے میں ایک سے دو بار استعمال کریں اگر اس کی بو آپ کو ناگوار لگتی ہے تو اس میں کسی خوشبو دار تیل کے چند قطرے شامل کر سکتے ہیں۔اس ماسک میں موجود انڈہ بالوں کو ضروری غذائیت فراہم کرے گا جبکہ پیاز کا رس اس کو بڑھانے میں اہم کردار ادا کرے گا۔