وزیر اعظم کے معاون خصوصی برائے بین المذاہب علامہ طاہر محمود اشرفی نے کہا ہے کہ اسلام رواداری کا مذہب ہے۔

علامہ طاہر محمود اشرفی نے پریس کانفرنس کرتے ہوئے کہا کہ اسلام رواداری کا مذہب ہے، تمام مسیحی قائدین کے ساتھ نشست ہوئی اس کا مقصد پاکستان ہم سب کا ہے۔

ان کا کہنا تھا کہ ہم فیصل آباد گئےجہاں اظہارِ یکجہتی پیش کیا، ان کی بیٹی بھی اسلام کی بیٹی ہے، ہماری ذمہ داری ہے کہ اقلیت کو تحفظ دیا جائے۔

انہوں نے کہا کہ جن لوگوں نے یہ ایکٹ کیا اسے جلد از جلد سزا دی جائے، 14 دن میں ملزمان کے خلاف چالان پیش کر دیا جائے گا، چیف جسٹس سے سپیڈی ٹرائل کے لئے گزارش کی ہے کہ تاکہ مجرمان کو سزا دی جائے۔

  طاہر محمود اشرفی کا کہنا تھا کہ جو شخص توہین مذہب، توہین رسالت ذاتی مقصد کے لئے استعمال کر کے مجرم ٹھہراتا ہے دراصل وہ توہین کر رہا ہے، الزام لگانے والا ہی خود ہی مجرم ہے۔

انہوں نے کہا کہ ہم چاہتے ہیں توہینِ رسالت کے قانون کو کوئی استعمال نہ کر پائے، توہینِ رسالت کا قانون بہت سی جانوں کا محافظ ہے لیکن اس کا خوف پیدا کیا گیا، اگر سیالکوٹ میں توہینِ رسالت کے قانون کو ماننے والے ہوتے تو وہ اس شخص کو نہ جلاتے۔

وزیر اعظم کے معاون خصوصی برائے بین المذاہب علامہ طاہر محمود اشرفی کا مزید کہنا تھا کہ مسائل تب بنتے ہیں جب اسے حل نہ کیا جائے، بہت تھوڑے مسائل ہیں لیکن اس کا حل کرنے کی ضرورت ہے، منگل کے روز ہندو سکھ سری لنکن ہائی کمیشن اظہارِ یکجہتی کے لئے جائیں گے۔