کینسر عجیب و غریب مرض ہے جس نے اب تک دنیا کو پریشانی میں مبتلا کررکھا ہے۔ اب ایک قسم کی کینسر تھراپی کا انوکھا سائیڈ افیکٹ (ضمنی اثر) سامنے آیا ہے جس میں کئی لوگوں نے رات میں بہتر اور صاف دیکھنے کا اعتراف کیا ہے۔

بعض مریضوں نے کہا ہے کہ اس سے اندھیرے میں دیکھنے کی صلاحیت بھی بڑھی ہے۔ اس طریقہ علاج کا نام فوٹوڈائنامک تھراپی ہے جس میں بعض اقسام کی روشنی کی شعاعوں سے سرطانی رسولیوں کو جلایا یا ختم کیا جاتا ہے۔

کئی برس پہلے مریضوں نے اس ضمنی اثر کے بارے میں اپنے معالجین کو بتایا تو اس کے بعد تحقیق شروع کی گئی۔ معلوم ہوا کہ اس عمل میں روشنی سے حساس ایک مرکب یعنی کمپاونڈ استعمال کیا جاتا ہے جسے کلورِن ای سکس کا نام دیا گیا ہے۔ جب اس کی کچھ مقدار بدن میں جاتی ہے تو وہ آنکھوں کے ریٹینا میں موجود ایک اہم پروٹین روڈوپسن سے عمل کرتی ہے۔ اس طرح روڈوپسن کی سرگرمی بڑھتی ہے اور لوگ بہتر دیکھنے لگتے ہیں۔

یہاں تک کہ کئی افراد نے تاریکی میں بھی بہتر طور پر دیکھنے کا اعتراف کیا ہے۔ یہ تحقیقی فرانس میں واقع یونیورسٹی آف لورین کے کیمیا داں اینٹونیو موناری اور ان کے ساتھیوں نے کی ہے۔

اگرچہ اس تحقیق کو انسانوں پر نہیں کیا جاسکتا تھا اس لیے مریضوں سے مزید تحقیق کرکے انہیں کمپیوٹرسیمولیشن اور الگورتھم پر ٹیسٹ کیا گیا جس سے کلورن ای سکس کے روڈوپسن پر اثرات اور نتیجے میں بینائی میں بہتری کے نتائج سامنے آئے۔