شبلی فراز نے کہا ہے کہ الیکشن کمیشن ای وی ایم کی خصوصیات کے بارے میں فیصلہ کرے۔

آئندہ عام انتخابات میں آئی ووٹنگ اور الیکٹرانک ووٹنگ مشین کے حوالے سے حکومتی کوارڈینیشن کمیٹی کے سربراہ وفاقی وزیر شبلی فراز کی چیف الیکشن کمشنر سے ملاقات ہوئی۔

 ملاقات میں انتخابی ترمیمی بل 2021 پر عملدرآمد سے متعلق تبادلہ خیال کیا گیا جبکہ ای وی ایم، سمندر پار پاکستانیوں کو ووٹنگ کے حق پر بھی گفتگو کی گئی۔

اس موقع پر وفاقی وزیر شبلی فراز نے پائلٹ ٹیسٹنگ کے لیے الیکٹرانک ووٹنگ مشینز کی فراہمی کی یقین دہانی کروائی۔

 ملاقات میں گفتگو کرتے ہوئے شبلی فراز نے کہا کہ وزیراعظم عمران خان نے الیکشن کمیشن کو بھرپور معاونت کی ہدایت کی ہے۔

وفاقی وزیر شبلی فراز کا مزید کہنا تھا کہ وزیراعظم عمران خان کا کہنا ہے کہ وقت آگیا ہے کہ انتخابات میں جدت کا راستہ اختیار کریں، الیکشن کمیشن ای وی ایم کی خصوصیات کے بارے میں فیصلہ کرے۔

ملاقات میں الیکشن کمیشن حکام نے کہا کہ رواں ماہ الیکشن کمیشن کی 3 کمیٹیاں اپنی رپورٹس جمع کرادینگی جبکہ کمیٹیوں کی رپورٹس کی روشنی میں ای وی ایم بنانے والی کمپنیوں سے پروپوزل طلب کیے جائیں گے۔

ملاقات میں الیکشن کمیشن کے ممبر سندھ اور بلوچستان بھی موجود تھے۔

یاد رہے کہ پارلیمنٹ کے مشترکہ اجلاس میں حکومت کی طرف سے پیش کیا گیا الیکٹرانک ووٹنگ مشین بل اپوزیشن کی شدید مخالفت اور ہنگامہ آرائی کے باوجود منظورکرلیا گیا۔

پارلیمنٹ کے مشترکہ اجلاس میں پاکستان تحریک انصاف (پی ٹی آئی) کی وفاقی حکومت اپنے اتحادیوں کے ساتھ مل کر الیکٹرانک ووٹنگ مشین کا بل منظورکرانےمیں کامیاب ہوئی۔

گزشتہ چند ماہ سے صدرعارف علوی، وزیراعظم عمران خان، وفاقی وزیراطلاعات فواد چودھری، وفاقی وزیر خارجہ شاہ محمود قریشی سمیت دیگرحکومتی رہنما اس ٹینالوجی کے لیے کوشاں تھے کہ آئندہ الیکشن ہرصورت میں الیکٹرانک ووٹنگ مشین کے ذریعے کروائے جائیں گے تاکہ انتخابی دھاندلی کا حل نکالا جا سکے۔