صدر مملکت عارف علوی نے قومی احتساب بیورو (نیب) کے نئے چیئرمین کے تقرر کے لیے باقاعدہ مشاورت کا آغاز کردیا۔

ایوان صدر کے ذرائع نے اس بات کی تصدیق کی کہ چئیرمین نیب کی تقرری کے معاملہ پر ایوان صدر متحرک اور فعال ہوگیا ہے اور آئین کے تحت  ایوان صدر نے  قومی اسمبلی میں  لیڈر آف دی ہاؤس، وزیراعظم عمران خان اور قومی اسمبلی میں اپوزیشن لیڈر شہباز شریف کو خط لکھ دیا ہے۔

اس خط میں ایوان صدر نے وزیراعظم عمران خان اور اپوزیشن لیڈر شہباز شریف سے نئے چئیرمین کے نام مانگے ہیں اور دونوں سے درخواست کی ہے کہ وہ ایسے نام ایوان صدر کو بھجوائیں جو کہ چیئرمین نیب کے لیے طے شدہ طریقہ کار اور قواعد و ضوابط پر پورا اتریں ۔

نئے نام آنے کے بعد  صدر حکومت اور اپوزیشن کے اتفاق رائے سے نئے چئیرمین کا انتخاب کریں گے اور اگر وزیراعظم اور اپوزیشن لیڈر کے درمیان کسی بھی ایک نام پر اتفاق نہ ہوا تو پھر صدر یہ معاملہ پارلیمانی کمیٹی کو بھجوا دینگے جس میں حکومت اور اپوزیشن اراکین کی تعداد برابر ہوگی، صدر وہ نام بھی پارلیمانی کمیٹی کے حوالے کر دینگے جو کہ وزیراعظم اور اپوزیشن لیڈر نے تجویز کیے ہونگے۔

واضح رہے کہ موجودہ چئیرمین نیب جاوید اقبال 8 اکتوبر کو اپنی 4 سالہ مدت ملازمت مکمل کرچکے ہیں، موجودہ چئیرمین نیب کو صدارتی آرڈیننس کے تحت نئے چئیرمین کی تعیناتی تک کام کرنے کی ہدایت کی گئی ہے۔